[A:675]བཞུགས་པ་དང་ཐོག་མར་མཇལ་བས། ཆོས་རྗེ་ཞལ་འཛུམ་མཛད་ནས་དབུའི་ཐོག་ཏུ་ཕྱག་བཞག་ནས་བུ་ཚ་འདི་ཀུན་མིག་རྩ་དང་གྲུང༌། བསགས་པ་ཡང་ཆེ། ཞའུའི་གྱོན་ལུགས་དང་ཅས་པས། ཁྱོད་ཀྱང་སྒོམ་ཆེན་ཅིག་ཏུ་བརྫུ་བར་འོང་གསུང༌། དེར་ཕྱག་དབུ་ལ་བཞག་པ་ཙམ་གྱིས་ཆོས་ཐམས་ཅད་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་བྱ་བ་དེ་ཐུགས་ལ་ལྷང་གིས་འཁྲུངས། ཆིབས་དེ་ཚོགས་སུ་ཕྱག་ཏུ་ཕུལ་བས་མཉེས་པ་དཔག་ཏུ་མེད་པ་མཛད། དེ་རྗེས་ལོ་ངོ་གསུམ་དུ་དཔོན་བྱང་འོད་དང་གཉིས་ཀྱིས་ཆོས་རྗེས་གནང་བའི་སྤྱིལ་པོ་ཅིག་ཏུ་ལྷན་ཅིག་ཏུ་ཐུགས་དམ་མཛད། བཅུ་བདུན་པ་ལ་ཆོས་རྗེ་དྭགས་པོར་གཤེགས་པའི་ཕྱགས་ཕྱིར་བྱོན། ཆོས་རྗེ་ཟངས་ལུང་དུ་བཞུགས་པའི་ཚེ་སྒམ་པོ་བའི་སྐུ་འབག་ལ་གསོལ་བ་བཏབ་པས། སྨིན་མཚམས་ནས་འོད་བྱུང་བས་དྭགས་ལུང་པ་ཁེངས་པའི་ངོ་མཚར་ཡང་གཟིགས། སྐུ་ཁམས་ཅུང་ཞིག་མཉེལ་བ་ལ་ཆོས་རྗེའི་གསུང་ནས། བོད་ཕྲུག་གཅིག་ལ་འདི་སྐུ་གཅེས། འདི་ད་ལན་མ་གྲོངས་ན་ཕྱིས་དྭགས་པོ་བཀའ་བརྒྱུད་ཀྱི་རྟེན་ས་ཅིག་འོང་གསུང་ནས་རིམ་གྲོའང་མཛད། ཆོས་རྗེའི་ཞལ་ནས། ད་ཁྱེད་ལ་སྐུ་ཚེ་ལ་སོགས་པ་ལ་བར་ཆད་གང་ཡང་མེད། རྣལ་འབྱོར་པ་མགོ་རྒྱལ་བ་བྱ་བ་ཡིན་གསུང༌། དེ་ནས་ཆོས་རྗེ་ཕག་མོ་གྲུར་ཕེབས་པའི་ཚེ་ཉེ་གནས་ཀྱང་མཛད། ཆོས་རྗེ་འོན་དུ་ལྷ་འབྲི་སྒངས་པ་མཇལ་དུ་བྱོན་པའི་ཚེ། ཁྱོད་བསྙེན་པར་རྫོགས་པ་གྱིས་གསུང་བས། ཁོ་བོས་ལོ་བཅོ་བརྒྱད་ལས་མ་ལོན་ཞུས་པས། འདུལ་བ་ང་