[A:691]གངས་རྡིབ་ཀྱིས་ཡུལ་ཁམས་བརླག་པ་སོགས་མང་དུ་བྱུང༌། ལོག་པར་སྒྲུབ་པ་གཞན་མང་པོའང་ཕུང༌། ཐུབ་པ་ཆུ་ཁོལ་མ་ལ་གསོལ་པ་བཏབ་པས་སྟོད་ལུངས་ཕུར་ཆུ་ཁོལ། བྱང་དུ་ལྷོག་ཚང་སྟེངས་སུ་སྒར་མཛད་པས་མི་ཕྱུགས་གང་ལའང་གནོད་པ་མེད། སྣང་སྒོམ་ཞེས་པ་ནང་བའི་ཆོས་ལ་ཐུགས་དམ་དུ་བྱེད་ཀྱང༌། འཕྲལ་བོན་པོའི་ཚུལ་འཛིན་ཅིང་མངོན་ཤེས་ཡོད་པར་གྲགས་པ་ཞིག་གིས་སྤྱན་སྔ་ནས་ལ་གཉན་ཐང་ལྷས་བསུ་བ་བྱེད་པ་དང༌། ཆོས་སྐྱོང་མང་པོ་བྱོན་པར་མཐོང་བས་དད་དེ་རབ་ཏུ་བྱུང༌། གླང་ལུང་པས་རྡོ་རྗེ་འཆང་དོངས་སུ་མཐོང་བ་ལ་སོགས་པའི་ཡོན་ཏན་དུ་མ་མངའ་འོ། །གདན་སར་ལོ་ཉི་ཤུ་བཞུགས་ཤིང་གདན་ས་གཏད་ནས་ཀྱང་ལོ་བཞི་བཞུགས་ཏེ། དགུང་ལོ་ལྔ་བཅུ་པ་ས་ཕོ་བྱི་བའི་ལོ་ལ་གཤེགས། ཞག་ཞེ་དགུའི་བར་དུ་མེ་ཏོག་གི་ཆར་དཔག་ཏུ་མེད་པ་བབ་བོ། །སྤྱན་སྔ་དཔལ་ལྡན་བཟང་པོ་བ་ནི། ཡབ་བདག་པོ་ཤཱཀ་རིན་པ་དང༌། ཡུམ་ཟི་ན་རིན་ཆེན་འཛོམ་པ་ལ་སྲས་དྲུག་ཡོད་པའི་བཞི་པ། ཆུ་མོ་ཕག་ལ་འཁྲུངས། དགུང་ལོ་གསུམ་པ་ལ་སྤྱན་སྔ་གྲགས་པ་བྱང་པ་ལ་དགེ་བསྙེན་མཛད། མཚན་དཔལ་ལྡན་བཟང་པོར་བཏགས། དགུ་པ་ལ་བརྟག་གཉིས་ཀྱི་སློབ་གཉེར་མཛད། བཅུ་པ་ལ་སྤྱན་སྔ་ཀུན་སྤངས་པ་ལ་ཆོས་ཁྲིད་རྣམས་གསན། མཁན་ཆེན་གྲགས་རྡོར་བ་དང་སློབ་དཔོན་ཞི་བ་དཔལ་གཉིས་ལ་རབ་ཏུ་བྱུང༌། མཚན་གྲགས་པ་བློ་གྲོས་སུ་བཏགས། བླ་མ་ཆོས་དཔལ་ཤེས་རབ་ཀྱིས་ཆོས་སྒོ་ཕྱེ། བཅུ་བཞི་པ་ལ་རྩེས་ཐང་དུ་རྟག་གཉིས་གསུངས།