[A:699]གདུམ་པ་བྱ་བའི་བོན་པོ་རང་རེའི་སྒོམ་ཆེན་པ་རྣམས་ལ་གནོད་པ་ཆེན་པོ་བྱེད་པ་ཞིག་བྱུང་བ་ལ་ཡང་དགེ་འདུན་གྱི་ཚོགས་སུ་བདེན་པ་བརྗོད་པས་དེ་རྣམས་མི་ཚང་དང་བཅས་པ་ཡུལ་དོན། གདན་ས་དང་ཉེར་བར་འགའ་ཞིག་གིས་གུས་པ་མ་ཡིན་པ་བསྟན་པའི་མི་ཚང་རྣམས་ཇེ་ཕྲ་ཇེ་ཕྲར་སོང་སྟེ་རྗེས་མེད་དུ་གྱུར། སྨྲ་བའི་སེང་གེ་རོང་སྟོན་ཆེན་པོ་ལ་སོགས་པའི་སྡེ་སྣོད་འཛིན་པ་མཁས་དགུ་རྣམས་དྲུང་དུ་ལྷགས་ཏེ། དེ་རྣམས་ལ་འབྲེལ་བའི་གཏམ་གནང་བ་ན་ཡང་དག་པར་བག་འཁུམས་པར་གྱུར། རྒྱ་མ་རིན་པོ་ཆེ་གཞོན་འོད་པས་ནི་བདེ་མཆོག་དངོས་ཀྱི་འདུ་ཤེས་ཀྱིས་ཞབས་ལ་གུས་པས་བསྟེན་པར་མཛད། བུ་ཆེན་རྟོགས་ལྡན་ཟབ་ཁྲིད་ཀྱིས་འགྲོ་བ་འདྲེན་ནུས་བའང་དིང་སང་གི་བར་དུའང་མང་དུ་བཞུགས། དགུང་གོ་ཞེ་དྲུག་པ་ལ་རྒྱུ་རིན་པོ་ཆེ་ལས་གྲུབ་པའི་སྒོ་མངས་ལེགས་པར་བཞེངས་པའི་ཞལ་བཀོད་སྣང་བས་ལྷ་རྣམས་གཞན་ལས་བྱོན་ལེགས་པ་གྲུབ། དེ་ལྟ་ན་ཡང་སྙིགས་མ་ལས་ཀྱང་སྙིགས་མའི་དུས་འབྱུང་བར་གཟིགས་ནས་ཤིང་ཕོ་སྟག་གི་ལོ་ཟླ་བ་དང་པོའི་མར་ངོའི་ཉེར་གཅིག་ལ་ཆོས་ཀྱི་དབྱིངས་སུ་སྐུའི་བཀོད་པ་བསྡུས། དེ་ལ་སྐུ་འཁོར་རྣམས་ཀྱིས་མཛེས་བཙལ་བས་ཉེར་གཉིས་པར་གྲགས། དགུང་ལོ་བཞི་བཅུ་རྩ་དགུ་བཞེས་པ་ཡིན། དེ་ནས་མིའི་དབང་པོ་གྲགས་པ་འབྱུང་གནས་ཀྱིས། དུས་མི་བདེ་ཡང་སྐུ་འདད་སྟོབས་ཆེན་པོ་ཡང་དག་པར་བསྒྲུབས། གདན་སའི་མཆོད་ཁང་དུའང་དངུལ་གྱི་མཆོད་རྟེན་ཆེ་བ་བཀྲ་ཤིས་སྒོ་མངས་ཀྱི་རྣམ་པ་ཅན་ཅིག་བཞེངས། དེ་རྗེས་མིའི་