[A:700]དབང་པོ་གྲགས་པ་འབྱུང་གནས་པ་ཐུགས་རབ་ཤིན་ཏུ་ཆེ་ཞིང༌། གསང་སྔགས་ཀྱི་མཁྱེན་པ་ཤིན་ཏུ་རྒྱས་པར་གྱུར་ཀྱང་གདན་སའི་བཞུགས་ཁྲི་རིན་པོ་ཆེ་ཤིན་ཏུ་གཉན་པར་དགོངས་ནས། གདན་སར་མ་བཞུགས་ཀྱང་གནས་ཆེན་དུ་འགྲོ་བའི་རི་བ་རྣམས་ལ་མགྱོགས་ཁྲིད་གསུངས་པས། ཞི་བར་གཤེགས་ནས་ཞལ་སློབ་དུས་མཆོད་འཛིན་པ་ནི་མང་དུ་བྱུང་མོད། གདན་ས་ནི་ཆུ་མོ་བྱའི་བར་ལོ་ཉི་ཤུར་སྟོངས། དེ་རྗེས་བདག་པོ་ཆེན་པོ་ཀུན་དགའ་ལེགས་པ་དང་ཆེས་སངས་རྒྱས་རྒྱལ་མཚན་པ་བཀའ་བགྲོས་མཛད་ནས་ཤིང་ཕོ་ཁྱིའི་ལོ་ཟླ་བ་བཅུ་གཅིག་པའི་ཚེས་བཅུ་ལ་ཆོས་ཀྱི་རྗེ་རིན་པོ་ཆེ་དཔལ་ངག་གི་དབང་པོ་དགུང་ལོ་བཅུ་དྲུག་བཞེས་པ་ཞིག་རིན་པོ་ཆེའི་གདན་སེང་གེའི་ཁྲི་ལ་བཞུགས་སུ་གསོལ། དེ་ནས་ས་ཕོ་སྟག་གི་ལོ་ལ་ལྷོ་བྱང་གི་དུས་གཟིངས་ལ་བརྟེན་ནས་སྣེ་གདོང་ནས་གདན་སར་རང་བྱོན་མཛད་ནས་བདག་ཏུ་གཟུང༌། དེ་ནས་ལོ་བཅུ་དྲུག་པ་ཆུ་མོ་སྦྲུལ་ལ་ལྷ་དང་མཁའ་འགྲོ་ཆོས་སྐྱོང་གཞི་བདག་རྣམས་ཀྱིས་སྤྱན་དྲངས་ཏེ་གདན་སེང་གེའི་ཁྲི་ལ་བཞུགས་སོ། །འགྲོ་མགོན་རིན་པོ་ཆེ་འཁྲུངས་ནས་དིང་སང་གི་མེ་ཕོ་སྤྲེའུ་ཡན་ལ་ལོ་སུམ་བརྒྱ་དང་དྲུག་ཅུ་རྩ་བདུན་སོང་ངོ༌། །ཕག་མོ་གྲུ་པའི་གདན་རབས་ཀྱི་སྐབས་སོ།།།།