[A:704]དགོངས་པ་བྱུང༌། སྐབས་དེར་ཐུགས་རྗེ་ཆེན་པོས་མཛེ་པོ་མང་པོ་ཡང་གསོས། དགུང་ལོ་སུམ་ཅུ་རྩ་ལྔ་ལ་ཞང་སུམ་ཐོག་པས་མཁན་པོ། ལས་སློབ་སློབ་དཔོན་ཙི་ལུང་བ། གསང་སྟེ་བ་གཉལ་པ་འདུལ་འཛིན་རྣམས་ཀྱིས་མཛད་དེ་ཚིག་རྫོགས་ཀྱི་བསྙེན་པར་རྫོགས་པ་མཛད། གཉལ་པ་འདུལ་འཛིན་ལ་གྱུང་ཁ་ལུང་དུ་འདུལ་བ་མདོ་རྩ་བ་གསན་པས་ཤིན་ཏུ་མཁས་པར་གྱུར། བླ་མའི་གདན་ས་ཡང་ལོ་ངོ་གསུམ་དུ་ཉེ་བ་ཅིག་མཛད། སུམ་ཅུ་རྩ་བདུན་པ་ས་མོ་ཕག་ལ་འབྲི་ཁུང་དུ་ཕེབས། ལོ་དེ་ཉིད་ལ་བཙུན་གསར་བརྒྱ་ཐམ་པ་བྱུང༌། བར་སྐབས་ཤིག་ཏུ་གངས་ཏི་སེར་འབྱོན་པར་ཆས་པས་གཉན་ཐང་ལྷས་བསུ་བའི་བཀོད་པ་རྒྱ་ཆེན་པོ་བྱས་པ་དཔོན་སློབ་ཉི་ཤུ་རྩ་བཞི་ལས་གཅིག་མ་གཏོགས་པ་ཐམས་ཅད་ཀྱིས་མཐོང༌། སྐུ་ཤིན་ཏུ་ཆེ་བའི་ཀུན་དགའ་བོ་ཞིག་ཀྱང་གཟིགས་ཤིང་གསུང་གི་སྣང་བ་ཡང་བྱུང༌། སླར་ཡང་འབྲི་ཁུང་ཉིད་དུ་ལོག་སྟེ་དགེ་སློང་གི་དགེ་འདུན་བགྲང་བར་དཀའ་བ་འདུས། ཟབ་མོའི་གདམས་པས་དེ་ཁོ་ན་ཉིད་རྟོགས་པར་མཛད་པའི་སློབ་མ་མང་པོ་ཨུ་རྒྱན་དང་ཛ་ལན་དྷ་ར་ཚུན་ཆོད་དང་རི་བོ་རྩེ་ལྔ་ཡན་ཆོད་ཀྱི་ལུང་སུལ་དང་རི་ཁྲོད་ཐམས་ཅད་དུ་ཁྱབ་པར་མཛད། ཉིན་གཅིག་འདུས་པའི་ཚད་ཀྱང་གཉོས་ཀྱི་བུར་སྟོན་ལ་ཚོགས་པ་ལྔ་ཁྲི་ལྔ་སྟོང་ལྔ་བརྒྱ་ཉི་ཤུ་རྩ་ལྔ་འདུས། དེ་ཡང་བོད་ཀྱི་དགེ་བའི་བཤེས་གཉེན་ཆེན་པོ་འགའ་ཞིག་སངས་རྒྱས་ཀྱིས་དྲང་བ་དང་ངེས་པའི་དོན་གཉིས་སུ་གསུངས་པའི་དྲང་བའི་དོན་ཐམས་ཅད་སྟོན་པ་ཐུགས་བསྐྱེད་བཟང་བས་རྫུན་དུ་མིང་མི་འདོགས་ཀྱང་ཚང་མའི་གནོད་པ་