[A:722]བདག་པོ་ཁྱོད་ཀྱིས་བྱེད་པ་ཡིན་ཡང་གསུང༌། དགེ་སློང་ཅིག་གིས་གསུང་བ་ལ་བདག་སྒྲུབ་པ་བྱེད་པ་ཡིན་པས། དགེ་སློང་མི་བྱེད་པར་ཞུ་ཞུས་པས། དཔལ་རྒྭ་ལོ་ཡང་དགེ་སློང་ཡིན་ཏེ། གནམ་མཚོ་ལ་ལོ་བདུན་བསྒོམས་འདུག དིང་སང་མི་ཆེན་པོའི་ཕྱག་ལེན་བྱེད་དགོས་པ་ཡིན་གསུང༌། སྐབས་ཤེད་དུ་གཟིམས་མལ་ན་བཞུགས་པ་ལ་སྔར་མེད་པའི་ཆོས་ཚན་ཅིག་ཐུགས་ལ་འཁྲུངས། དེར་འགྲོ་མགོན་ཕྱག་མཁར་བསྣམས་ནས་བྱོན་ཏེ། ཕྱག་མཁར་ཐུགས་ཀར་གཏད་ནས་འདི་ཁོ་བོ་མིན་པས་མི་ཤེས་གསུང༌། ནུབ་ཅིག་ཡབ་ཀྱིས་ཏེའུ་ཆུ་ཅིག་བྱིན་པ་རྨིས་པས་བཟའ་མི་ཟད་པའི་གཏོར་ལ་ལོངས་སྤྱོད་པ་ཡིན་གསུང༌། ཡང་ཡབ་ཀྱིས་ལྡེ་མིག་ཡ་གཅིག་བྱིན་པ་རྨིས་ཏེ་ཕྱིན་ཆད་ཆེད་དུ་བྱ་མི་དགོས་པ་བྱུང༌། དགུང་ལོ་ཉི་ཤུ་རྩ་བཞིའི་བཙས་མའི་དུས་ཕག་མོ་གྲུར་ཕེབས། ལོ་དྲུག་ཕག་མོ་གྲུར་བཞུགས། དཔལ་ཕག་མོ་གྲུ་པ་གཤེགས་ནས་ཟླ་བ་གཅིག་ཕག་མོ་གྲུར་བཞུགས་ནས་དབོན་ཕྱག་དང་ཡོན་བདག་རྨོག་སྒོམ་ལ་སོགས་དང་འགྲོགས་ནས་མལ་གྲོ་ལ་བྱོན་ཏེ་འཆད་ཁ་བ་ལ་ཆོས་གསན། དེ་ནས་ཀླུང་ཤོད་ན་ཡང་བཀའ་གདམས་པ་འགའ་ཞིག་དང་འགྲོགས་ནས་བྱོན་པས་ཁོང་རྣམས་ན་རེ། ཞྭ་དེ་སྤོས་ཟེར་བ་ལ། དེར་ངའི་ཞྭས་དབུར་སྟོད་འདིར་སྐྱེལ་མ་ཐུབ་པ་ཅིག་བྱེད་དགོས་དགོངས་པ་བྱུང༌། དེ་ནས་ཕོད་མདོ་ཁང་ཆེན་དུ་བྱོན་པས་དགེ་བཤེས་ཁང་ཆེན་པ་ཕྱིར་བྱོན་པ་དང་སྒོ་འགག་ཏུ་མཇལ་བས་ཁོང་དད་ནས་ཁོང་གི་བླ་མཆོད་དུ་ཐང་མགོ་དགོན་པར་དགུན་ཅིག་བཞུགས། དེའི་དཔྱིད་ནས་སེ་