[A:737]བྱོན། མཐོང་སྣང་ཀྱང་གྲངས་མེད་པ་བྱུང་ངོ༌། །དེའི་གདན་ས་བ་སངས་རྒྱས་ཡར་བྱོན་ཤེས་རབ་བླ་མ་ནི། བོད་ར་སྟེངས་ཀྱི་གདོང་སྣར་ཡབ་ཆེན་མགོན་རྒྱལ་དང༌། ཡུམ་ལྷ་མོ་དཔལ་གྱི་སྲས་སུ་ཆུ་མོ་ཕག་གི་ལོ་ལ་སྐུ་བལྟམས། ཆུ་ཕག་འདི་སྟག་ལུང་ཐང་པའི་དྲུག་ཅུ་རྩ་གཉིས། འབྲི་ཁུང་པའི་རེ་གཅིག སྐུ་ཡལ་བའི་བཅུ་གསུམ་པ། རོང་པ་རྒྭ་ལོ་འཁྲུངས་པའི་ལོ་དེ་ཡིན། སྐུ་གཞོན་པ་བྱིས་པའི་དུས་ནས་དད་པ་དང་བརྩོན་འགྲུས་དང་སྙིང་རྗེ་ཆེ་བ། ན་མཉམ་རྣམས་སྡིག་པ་ལས་ཟློག་ཅིང་དགེ་བ་ལ་སྦྱོར་བ། གཅིག་པུ་དབེན་པར་སྤྱོད་པ་ཅིག་བྱུང༌། བཅུ་དྲུག་པ་ལ་མཁན་ཆེན་ག་སྟོན་བླ་མ་དང་སློབ་དཔོན་ལྷ་ཁང་ལྟག་པ་ལས་རབ་ཏུ་བྱུང༌། མཚན་ཤེས་རབ་བླ་མར་གསོལ། འདུལ་བའི་ཕྲན་རྣམས་ཀྱང་གསན། སློབ་དཔོན་ནགས་པ་ལ་གདམས་པ་མང་དུ་གསན། ས་ཕུ་དགོན་དུ་སྒྲུབ་པ་མཛད། གཟིམས་ཁང་གི་ཁར་བྱ་རོག་གིས་འཕྱག་པ་སོགས་མང་དུ་བྱུང༌། བཅུ་དགུ་ལ་དབུས་སུ་བྱོན་ནས་སྟག་ལུང་ཐང་དུ་སྐུ་ཡལ་བའི་དྲུང་དུ་མཇལ། ཆོས་ཁྲིད་རྣམས་ཡོངས་སུ་རྫོགས་པར་གསན། མཁན་པོ་གཙང་པ་དང་སློབ་དཔོན་ཁུ་སྟོན་དང༌། གསང་སྟེ་བ་སློབ་དཔོན་དོན་མོ་རི་པས་མཛད་ནས་བསྙེན་པར་རྫོགས། ལོ་བཅོ་ལྔའི་བར་དུ་སྒྲུབ་པ་མཛད། མངོན་པར་མཁྱེན་པ་རྒྱ་ཆེན་པོ་མངའ། སུམ་ཅུ་རྩ་བཞི་པ་མེ་ཕོ་སྤྲེའུ་ལ་སྐུ་ཡལ་རིན་པོ་ཆེ་གཤེགས་ནས་གདན་སར་ཕེབས། གསེར་འབུམ་དང༌། དངུལ་གྱི་གདུང་ཁང་དང༌། མཆོད་ཁང་ཆེན་མོའི་ཐིགས་ཁང་དང་རས་བྲིས་མང་