[A:739]གསུང༌། གདུང་སྦྱངས་པས་ནམ་མཁའ་འཇས་གང༌། མེ་ཏོག་དང་རིང་བསྲེལ་ཆར་ལྟར་བབ། ཐུགས་ལྗགས་དང་རིང་བསྲེལ་མང་དུ་བྱོན་ནོ། །མངྒལ་གུ་རུ་ནི། མེས་བན་གླང་འབར་པོ་ལ་སྲས་བཞི་ཡོད་པའི་ཆེ་ཤོས་སྟག་ལུང་ཐང་པ། ཡོན་བདག་མགོ་ཡགས། མགོ་རྒྱལ། བླ་མ་ཟླ་འོད་དང་བཞིའོ། །མགོ་ཡགས་ལ་སྲས་སྐུ་ཡལ་བར་བ། ཡོན་བདག་ཆོས་ཡགས། ཨ་ཀུན། ཆོས་སྐྱབས་དང་བཞིའོ། །ཆོས་ཡགས་ལ་སྲས་མངྒལ་གུ་རུ། ཞང་སྐྱབས། ཐུབ་པ། ལོང་པོ་དང་བཞིའོ། །བླ་མ་ཟླ་འོད་པས་ཕྱིས་སྟག་ལུང་དུ་བྱོན་ནས་སྐུ་ཡལ་བའི་སྐབས་སུ་སྟག་ལུང་དུ་གཤོགས། མངྒལ་གུ་རུ་ཆོས་ཡགས་དང་ཟོ་ཟི་གཟའ་གཟུངས་སྒོམ་གྱི་སྲས་སུ་ལྕགས་མོ་ཡོས་ལ་འཁྲུངས། ལྕགས་ཡོས་འདི་སངས་རྒྱས་ཡར་བྱོན་གྱི་ཉི་ཤུ་རྩ་དགུ་པ་ཡིན། དགུང་ལོ་བཅུ་དྲུག་པ་ལ་མཁན་པོ་ཐང་སྐྱ་བ་དང༌། སློབ་དཔོན་མཁས་པ་གྲགས་པ་བཟང་པོ་ལས་རབ་ཏུ་བྱུང༌། མཁན་སློབ་ལ་འདུལ་བ་དང་ལམ་སྒྲོན་དང༌། ཇོ་བོ་རྗེ་ནས་བརྒྱུད་པའི་ཆོས་མང་དུ་གསན། བླ་མ་མཁས་གྲུབ་ཆེན་པོ་ལ་ཀྱེའི་རྡོ་རྗེ་དང༌། དུས་འཁོར་དང༌། གསང་འདུས་སྒྲོན་གསལ་དང༌། གདན་བཞི། མ་ཧཱ་མཱ་ཡཱ། ཕག་མོ། དཔྱལ་གྱི་ཆོས་དྲུག་དང༌། གུར་དང༌། སམྦུ་ཊི། སྟག་ལུང་ཐང་བ་ཆེན་པོའི་ཟབ་ཆོས། ཕག་མོ་བརྡ་བཞི། ནཱ་རོ་པའི་བཞི་ཆོས་རྩ་འགྲེལ། བདེ་མཆོག་སྙན་བརྒྱུད། སེམས་བསྐྱེད་སུམ་སྦྲེལ། རིན་ཆེན་ཐེམ་སྐས། དབང་གི་ལག་ལེན། ཟབ་མོ་བླ་མའི་རྗེས་གནང༌།