[A:244]gsang sngags gsar rnying gi gdams pa mang du zhus/ khyad par jo 'ber la snying thig gi gdams pa ma lus par zhus nas/ ri khrod lung stong rnams su lo du mar sgrub pa la nan tan mdzad/ skal ldan mang po smin grol gyi lam la bkod de/ drug cu rtsa bzhi la gshegs so/
/de'i slob ma me long rdo rje ni/ sgrags phur rnal 'byor pa bsam yas dang yum 'bar ma gnyis kyi sras su chu mo yos la 'khrungs/ lo dgu la grub thob za lung pa dang mkhan chen se lung ba gnyis la rab tu byung / rangs mtshor bsgoms pas nyams 'bar zhing mngon shes cha phra mo shar/ bcu drug la sgrags phu'i zhogs stengs su tshogs brgya tshar byas pas gnas lugs kyi don rtogs/ de nas yul phyogs mang por byon nas bla ma mang du bsten/ sha bug stag sgo dang mkhar chu la sogs su dka' thub dang dka' spyad mang po mdzad/ bco brgyad pa lcegs spre la seng ge rgyab tu sangs rgyas dbon po la snying thig rnams zhus/ bsgom pas nyin zhag drug cu rdo rje sems dpa' nyin mtshan med par mthong / dngos gzhi'i dus bla ma brgyud pa rnams dang rmi lam du mjal nas byin gyis brlabs/ nyi shu rtsa gsum pa la sangs rgyas ras pa la rdo rje phag mo la sogs gter chos mang du zhus pas rdo rje phag mo dang mjal/ 'od phung gi dkyil na bde mchog lhan skyes/ rta mgrin/ sgrol ma/ thugs rje chen po/ kun bzang / rdor sems/ bi ma la/ u rgyan/ za lung pa/ sangs rgyas ras pa/ 'gro mgon rin po che