[A:625]brag dkar dang khu byug dben pa rdzong dang brag dmar gsum du shas cher bzhugs shing / gzhan rnams su yang gnas 'brel re mdzad/ rje btsun dang yang mnal lam du mjal zhing mgur gsungs/ thugs dam kyang shin tu 'phel/ de phyogs su lo gsum bzhugs/ 'phags pa wa ti yang mjal/ de nas phyir log ste chos rje'i 'khrungs sar yang bzhugs shing / ding rir yang byon/ de nas sbu trar byon pas grub chen pa'i sku skye btsun chung lo bcu gsum lon pa dbang po dwangs pa cig 'dug pa la yang chos 'brel gsan zhing / mkhan chen bsod nams 'od zer la yang chos zhus/ der dpon chen dbon po ting 'dzin bzang po dang mjal/ gser srang gang khong gis phul/ de nas bde chen du chos rje'i drung du phebs/ lo ril po lnga'i bar du bde chen du thugs dam la bzhugs shing chos mang du gsan/ mkhan chen gzhon nu byang chub dang slob dpon bkra shis rin chen la sogs pa las bsnyen par rdzogs/ mkhan po la chos 'gar yang gsan/ der tshogs gral cig tu 'od gsal gyi ngang du dwags lha sgam po'i ri dang dwags po lha rje 'ja' 'od kyi dkyil na bzhugs pa gzigs pa'i mod la sngon gyi gnas rjes su dran par gyur te/ sku skye snga ma rnams gsal bar gzigs shing de'i mgur yang gsungs/ 'od ston dang g.yam bzangs pa gnyis kyang de dus nas slob ma yin tshul yang gsungs/ skabs shig tu chos rje rang byung ba bsnyungs nas 'o skol la gtsang phyogs na gtad byed mi