[A:321]sum gyis grub cing/ de yang thugs rgyud byang chub kyi sems gnyis kyis lhag par phyug pa'i rgyu mtshan gyis yin par nges so//
mdor na gangs can gyi mkhas pa rnams kyi nang nas/ gsung dngos su thos pa'i slob ma gzhung lugs shes pa'i grangs ni bdag nyid chen po 'di las mang ba med do//
de dag la 'di skad ces/
mkha' lding gis ni chu gter gyi//
bdud rtsi snying pa rab phyung nas//
sum rtsen dpag bsam rtser 'khod de//
lha rnams kun dgar byas zhes thos//
rnam dpoyad bshog rlabs can zhal gyis//
gsung rab rgya mtsho'i bcud phyung nas//
mkhas pas bteg pa'i khrir 'dug ste//
sa stengs blo gsal kun dga'i dpal//
gzhan dag gzhung lugs gang 'chad kyang//
tshig gi phreng ba star la brgyud//
khyod kyis don gyi mdo bzung bas//
bstan bcos tshig rnams ngang gis 'char//
1.2.5.1.2.1.2
gnas gang du yon gyi bdag po sus mdzad pa/
gnyis pa ni/
dge legs tshogs kyis rab gang ba'i//
nor 'dzin khor yug dang bcas pa//
chu gter dbus su bying ba na//
khyab 'jug gis ni bteg ces grags//
bstan pa 'degs pa'i ka chen yang//
gtong phod lugs brgya ldan pa yi//
sa skyong 'byor pa'i stegs kyis ni//
gus pas bteg pa der phyag bya//
de yang rje btsun rnal 'byor gyi dbang phyug chen po 'di/ g.yon ru khra 'brug gi gtsug lag khang dang/ thang po che dang/ dpal rtse thang dang/ phag mo gru'i gdan sa chen po rnams su chos kyi 'khor lo bskor ba'i bdag po'i rkyen ni/ dbang grags pa rgyal mtshan dpal bzang pos gnang ba dang/ che sa dgon bsar ba dang/ rgyal bzang rin rgyal la sogs pa rnams kyis phul lo//
bsam yas kyi gtsug lag khang du/ chos kyi 'khor lo skor ba'i bdag rkyen ni/ gtso bor lha dbu tshal ba dang/ gser khang dpon 'dzom la sogs pas mdzad do//