[A:319]ni//
sems kyi mdud grol mchog lags te//
gzigs shig gzhan la med pa'i chos//
yongs la dag snang ris med pa'i//
kun spyod sor bcu sbyor ba'i tshul//
dga' ba rgyas pa'i mig dkyus dag//
rang grol mchog gi rgyang ring bltas//
mkhas grub kun gyi bzhed srol rnams//
ma 'dres yid dga'i rnam rol du//
legs rtogs sems kyi mching grol mchog//
'di na rang babs lhug par skyong//
gang yang rnam mang chos tshul yongs la sdang sems med pa'i lhag bsam can//
gang yang bstan 'dzin skyes bu kun la phyogs cha med pa'i mos gdungs can//
gang yang mkha' khyab bstan pa kun la nye ring med pa'i phan sems can//
gang yang sngon bsags smon lam gyis grub 'bad pa med pa'i phrin las can//
gang gang legs smon 'di de bzhin//
yang yang phan bde'i dge 'bras dag//
de de de bzhin rang gzhan la//
'bad 'bad mi dgos lhun grub shog//
skye ba du mar bsags khyab mthar phyin pas//
tshe 'dir ji lta'i re smon yongs gang ba//
'di de dkon mchog thugs rje'i mthu nyid dang//
brgyud ldan bla ma'i byin rlabs las byung bas//
da dung nad med yun du 'tsho ba dang//
zang zing g.yengs ba'i bdud kyis ma khyer bar//
lha bsgom sngags bzla bka' bsrungs mchog rten pa'i//
bsam pa lhun gyis grub pa'i rgyur gyur cig//
ces rnam thar mtshar rgyan 'di yang gang la dad pa'i gdung shugs skyo bsun mi mnga' zhing/ mos gdungs kyi dpal 'dzin pa'i skal bzang mi yi dbang pos nan gyis bskul ba'i ngor brjed ngas dang le lo'i bgyid skyur spangs te/ ji snyed kyi don ji lta'i yi ger bkod pa 'di yang/ dpal ldan kun dga' grol mchog blo gsal rgya mtsho'i sde'i blo gros kyi rgya mtsho las so// //