R1: chos kyi rje thams cad mkhyen pa rdo rje gdan pa chen po kun dga' rnam rgyal dpal bzang po'i rnam par thar pa ngo mtshar rin po che'i gter mdzod/ {bod yig glog rdul dpe cha/}
[B:53b]thugs sras rnams la legs gtad nas/ /kun khyab chos sku mngon du mdzad/ /longs skur bzhengs te dag pa yi/ /zhing du gshegs tshul ltas mang bcas/ /slar yang sprul pas rjes 'dzin mdzad/ /bdag cag gi bla ma de nyid tshor bas bsdus pa'i sdug bsngal mtha' dag zad par spangs kyang / gzhan snang tsam du dgung lo drug cu rtsa lnga pa me zhes bya ba me pho 'brug gi lo nag pa zla ba'i phyogs phyi ma'i tshes gcig tsam nas cung zad bsnyun pa'i tshul bstan pa las/ don du sku la zug gzer gyi rnam pa cung zad kyang med pas zab gsal gyi thugs dam las mi g.yo bar bzhugs shing / rgyun ldan du tha mal pa ltar sman dpyad sku rim sogs kyi spros pa mi snang yang / de lta mod kyi rjes 'jug rnams bsod nams gsog pa dang gzhan gyi kha na ma tho ba'i brjod pa spang ba'i phyir/ gso dpyad mkhas pa 'ga' zung gis 'phrod bsten sna re tsam gyi ngo bstun pa dang / sku rim gyi tshul yang ji ltar bzhed pa bzhin bsgrub chog par rjes su [A:178]gnang ba ltar rgyun mi chad par bsgrubs shing / khyad par dad 'dus kyi bu slob dge 'dun byin gyis zhing 'dir zhabs pad brtan zhing chos kyi 'khor lo bskor du gsol bar sgo gsum gyi 'dun pa rtse gcig par nyin mtshan khor mor gsol ba btab mod/ rje btsun dam pa de nyid 'chi bdag gi bdud sogs bdud bzhi'i g.yul las rnam par rgyal zhing / rtag pa brtan pa zhi ba g.yung drung gi go 'phang mchog sngon nas brnyes shing rten 'dir yang nang rlung sems gnyis la brtan pa thob pas phyi snang ba yul rnams dbang du 'dus shing / srog rtsol gyi ting nge 'dzin la dbang 'byor bas/ gdul bya rnams las dang skal ba dang ldan na ji ltar bzhed pa bzhin sku tshe byin gyis brlab nus kyang / 'gro ba 'khrul snang rtag 'dzin can dang / rnam g.yeng dang le lo'i 'dam du bying ba rnams 'bad rtsol gyis chos la gzung ba'i phyir dang / khyad par zhing 'di'i gdul bya'i lhag ma de tsam kho nar bas pa dang