[A:117]/ /rgyal rabs gsal ba'i me long ngam chos 'byung gsal ba'i me long bzhugs so/ /
/ /'phags pa thugs rje'i bdag po spyan ras gzigs dbang phyug la gus pas phyag 'tshal lo/ /'gro ba'i re skong dgos 'dod 'byung ba'i dpal// rkang gnyis gtso bo yon tan kun gyi gter/ /lha mi'i ston pa shAkya'i rgyal po la// lus ngag yid gsum gus pas phyag 'tshal lo/ /tshad med mkhyen rtse'i thugs rje rab rgyas pas/ /gang la gang 'dul sprul pas bod yul gyi/ /'gro rnams smin grol lam la 'god mdzad pa'i/ /spyan ras gzigs dbang de la phyag 'tshal lo| |dpag med bsod nams lhun grub mi yi bdag /mang pos bkur ba'i gdung brgyud rin po che/ /bu ram shing pa la sogs rgya gar gyi/ /rnam dag rgyal brgyud rnams la phyag 'tshal lo/ /bod yul mtha' 'khob mun pa'i smag rum 'dir/ /dam pa chos kyi sgron me chen po spar/ /bod 'bangs sems can bde la 'god mdzad pa/ /sprul pa'i rgyal blon rnams la phyag 'tshal lo/ /phan bde'i 'byung gnas bslab gsum rgyan gyis mdzes/ /bka' dang bstan bcos sgra bsgyur gtan la 'bebs/ /sangs rgyas bstan pa phyogs bcur rgyas mdzad pa'i/ /mkhas grub lo paN rnams la phyag 'tshal lo/ /yon tan mtha' yas bsam bya'i yul las 'das/ /spyan ras gzigs dang chos rgyal mes dbon gyi//