[A:214]gcig tu bzung nas zhag gcig tu rtswa byin cing chu ma byin no/ /de'i sang rte'u rnams kyi khrod du btang bas/ rang rang gi ma gang 'dug rtsa nas 'o ma 'thungs so| |der ngo shes/ nged kyis ngo shes/ gzhan rnams kyis ma shes pas/ lha gcig zhu'o byas pas/ da rung rig pa 'gran zer nas ma byin no/ /yang de'i sang bya mo brgya bu brgya gtad nas/ 'di rnams ma bu phyogs gcig tu sus ngo shes pa la lha gcig ster zer ro/ /yang gzhan gyis ma shes/ mgar gyis thang yangs cig la/ sbang ma gtor nas bzhag ste/ der bya rnams kha gtad do/ /de gnyis gnyis lhan du zos so/ /skye'i 'og nas za zhing spyod pa 'tshub pa 'di rnams bu yin/ de min rnams ma yin no byas pas ngo shes/ nged kyis ngo shes/ gzhan gyis ma shes pas/ lha gcig zhu'o byas pas/ da rung rig pa 'gran zer nas ma byin no/ /yang gsam gyi shing ldum po brgyad gtad nas/ 'di rnams kyi mgo mjug sus shes pa la ster zer ro/ /yang gzhan gyis ma shes so/ /mgar gyis shing de rnams chu 'gram du khyer nas chu la bskyur bas/ rtsa ba lji bas thur du song / rtse mo yang bas gyen du lus so/ /nged kyis ngo shes/ gzhan gyis ma shes pas/ lha gcig zhu byas pas/ da rung rig pa 'gran zer nas ma byin no/ /der dgong cig pho brang nas rnga bo che brdung ba dang / blon po gzhan rnams pho brang du song / bod blon rnams kyi gnas mo de na re/ blon po gzhan rnams pho brang du song / khyed cag tsho yang mi 'gro'am/ phyin pa legs so zer bas/ mgar na re/ nged la shog kyang mi zer/ rnga de ci yin cha med byas pas gnas mo na re/ blon po gzhan rnams song ba na/ khyed la shog mi zer kyang / 'gro ba yin mod zer ro/ /