[A:96]mthil du byon nas/ paNDi ta sa manta shI la lo lnga zla ba bcu zhag lngar bar ma chad par bsten nas/ bshad bka' dang dbang bka' man ngag bka' dang bcas pa zhus pas legs par gnang ste paNDi ta bod du spyan drangs nas rgyud 'grel yan lag dang bcas pa bshad sgyur gtan la phab/ thams cad kyis bsnyen bkur cher byas te/ nyi ma gcig la gser srang sum brgya phul/ gshegs skyel yang skyi rong gi bar du mdzad pas/ bla ma yang shin tu mnyes te paNDi ta 'bum phrag gsum pa'i srog zhu/ chags lham rdor dril dus 'khor lugs kyi phyag tshad ma gnang ngo / /de la nyid kyi sras bla ma ye shes sengges gsan cing / des kyang bum pa gang byo'i tshul du thugs la mkhyen cing / thugs nyams su bzhes so/ /de la nyid kyi sras rwa 'bum seng gis yongs su rdzogs par gsan cing / thugs nyams su bzhes so/ /de la bla ma grwa los zhus so/ /bla ma sgra lo ni bod kyi rgyal po'i dus su/ blon po tha sang shi pho nyar btang ste/ rgya nag las hwa shang spyan drangs pa dang 'brel bar mi nyag hwa shang du gyur pa spyan drangs te/ rgyal po'i mchod gnas su gyur cing / theg pa chen po'i gzhung lugs ma nyams par spyod pa'i sngags 'chang sha stag tu gyur pa'i brgyud las/ ya 'brog sgang du mi nyag gzhon nu snying po zhes bya ba byung / de'i sras gzhon nu sengge/ de'i sras rig 'dzin snying po/ des rang gi rgya ma'i yul du babs/ de'i sras rdo seng gis rong mkhar phug bzung / de la sras bzhi byung pa'i gcen po ye shes rdo bya ba mkhas shing grub pa brnyes pa zhig byung / des phyag rgya chen po dbyug chos su grags pa'i man ngag las grub pa thob pa dbang phyug rgyal po zhes bya ba'i gdan sa dben dmar bzung / de'i sras rje btsun grwa lo ni/
rtsom 'phro lus 'dug go //