[A:༣༨ན]༄༅༅། །ལ་མི་འཇིག་པའི་སྤོབས་པ་ཡང་དག་པའི་རིགས་པ་སེང་གེའི་ང་རོས་ཕས་ཀྱི་རྒོལ་བ་མ་ལུས་པ་འཇོམས་པའི་སྟོབས་དང་ལྡན་པ། སྨྲ་བའི་སེང་གེ་ཐམས་ཅད་མཁྱེན་པ་གཉིས་པས་དཔལ་ལྡན་གསང་ཕུར་སྦྱར་བའོ།།
Printing Colophon, f. 38a1-6
༏ ༎སྭ་སྟི་ཛ་ཡ།
ངོ་མཚར་ཤེས་བྱའི་རི་མོ་མཐའ་དག་མཁྱེན་པའི་ཆ་ཤས་གཅིག་ལ་བྲིས།
།སྲིད་པ་གསུམ་གྱི་ལུས་ཅན་མཐའ་དག་བརྩེ་བའི་ཞགས་པ་གཅིག་གིས་བཟུང།
།འགྲོ་ལ་ཕན་བདེའི་ཆར་རྒྱུན་མཐའ་དག་མཛད་པའི་ཆུ་འཛིན་གཅིག་གིས་བསྒྲུབས།
།དེ་འདྲ་གང་ཡིན་ཟས་གཙང་སྲས་ཞེས་ཀུན་གྱིས་མཆོད་པའི་ཡུལ་དེ་རྒྱལ།
༏
།གསུང་ཟེར་ཕྲེང་པབ་ལྔ་སྐྱུགས་པས།
།མདོ་སྡེའི་པད་མོ་ཀུན་བཞད་ཅིང།
།ཀུན་གྱི་མགྲིན་པ་མཛེས་བྱེད་པ།
།མི་ཕམ་མགོན་ལ་ཕྱག་བགྱིད་དོ།
།དགའ་ལྡན་གནས་སུ་རབ་བགྲོད་པའི།
།ངོ་མཚར་གཏམ་གྱི་དགའ་སྟོན་གྱིས།
།སྐྱེ་དགུའི་ཡིད་རབ་འཕྲོག་བྱེད་པ།
།ཐོགས་མེད་ཞབས་ལ་གུས་པས་འདུད།
༏
།གང་གི་ཞབས་སེན་པད་དཀར་ཕྲེང་པབ་མཁས་པ་ཀུན་གྱི་ཐོད་དུ་བཅིངས།
།རྨད་བྱུང་མཁྱེན་པའི་གོ་སྟོབས་གཅིག་གིས་མཁས་གསུམ་ར་བ་ཀུན་ལས་འགོངས།
།གསུང་གི་བདུད་རྩིའི་ཟེགས་མ་ཙམ་གྱིས་རྣམ་དཔྱོད་ལུས་སྟོབས་བསྐྱེད་མཁས་པ།
།ཀུན་མཁྱེན་རོང་སྟོན་ཆོས་རྗེའི་ཞབས་ལས་གཞན་དུ་སྔོན་ཆད་སུ་ཞིག་བྱུང།
༏
།དེ་ལྟ་ན་ཡང་གངས་ཅན་འདིར།
།འཇིག་རྟེན་ཀུན་གྱི་སྒྲོན་མ་ལ།
།རྨོངས་པའི་མུན་ལས་མ་གྲོལ་བའི།
།མེ་ཁྱེར་ཚོགས་ཀྱིས་འགྲན་པ་འཚར།
༏
།གསུང་ཟེར་ཆ་ཙམ་ལྷུང་བས་ཀྱང།
།ཐུབ་བསྟན་པད་མོ་རྒྱས་བྱེད་ཅིང།
།བློ་ཡི་མུན་པ་དྲུངས་འབྱིན་པའི།
།ལེགས་བཤད་འོད་བརྒྱའི་ཕྲེང་པབ་འདི།
།ལྗོན་པའི་རྟ་བདུན་གྱིས་དྲངས་ཏེ།
།སྐལ་ལྡན་ཀུན་གྱི་ནམ་མཁའ་ལ།
།འབད་པ་མེད་པར་འཆར་བ་འདི།
།ལུང་རིགས་མན་ངག་ཀུན་སྦྱངས་པའི།
།བོད་ཡུལ་དབུས་ཀྱི་ཡར་ལུངས་པ།
།ནམ་མཁའ་དཔལ་ལྡན་གང་དེ་ཡིས།
།མཉམ་མེད་ཆོས་ཀྱི་རྒྱལ་པོ་འདི།
།རྟག་ཏུ་སྐུ་ཚེ་བརྟན་ཕྱིར་བསྒྲུབས།
།སྤར་ཀྱི་ཕྱོགས་ལ་འགྲན་གྱི་དོ་མེད་པའི།
།དད་པའི་བསམ་པ་འགྱུར་བ་མེད་པ་ཡིས།
།མི་ཡི་མཆོག་གྱུར་ལེགས་པ་བཟང་པོ་དང།
།བརྩོན་འགྲུས་བཟང་པོ་གཉིས་ཀྱིས་པར་བརྐོས།
།འདིར་འབད་དགེ་བ་མཐུ་ཆེན་དེས།
།ཐུབ་བསྟན་ཀུན་ནས་རྒྱས་གྱུར་ཅིག༎
།ཕ་མས་གཙོ་བྱས་འགྲོ་བ་ཀུན།
།ཐེག་མཆོག་གཏམ་གྱིས་ཚིམ་པར་ཤོག།
།མཾ་ག་ལཾ༎་༎ཤུ་བྷཾ༎