[A:༣༤]དུས་དཀྱིལ་འཁོར་གཙོ་དང་དབྱེར་མེད་པས། །ཟབ་མོའི་དོན་གསུངས་གནས་དང་མཁའ་ཀུན་ལ། །འོད་དང་འོད་ཟེར་རོལ་མོའི་སྒྲ་སྒྲོགས་པས། །བདག་ཡིད་ཏིང་འཛིན་སྒོ་མང་འབྱེད་ལ་འདུད། །རྡོ་རྗེ་འཆང་དང་འཇམ་མགོན་དབྱེར་མེད་པས། །བླ་མ་མཆོག་དང་དམ་པ་ཁྱེད་ཉིད་ལ། །ཁྱད་པར་འགའ་ཡང་བདག་གིས་ཡོད་མ་ཤེས། །དེ་སླད་བྱང་ཆུབ་བར་དུ་བདག་སྐྱབས་མཆི། །ཁྱོད་ཀྱི་ཡོན་ཏན་དཔག་ཡས་སངས་རྒྱས་དང༌། །བྱང་སེམས་ཆེན་པོ་རྣམས་དང་དབྱེར་མེད་ན། །བདག་འདྲས་བསྐལ་པར་བརྗོད་པར་ག་ལ་ནུས། །དེ་ལྟར་དེ་འདྲའི་སྐྱེས་ཆེན་ཁྱེད་ལ་འདུད། །ཆུང་ངུའི་དུས་ནས་ཁྱེད་ཀྱི་ཐུགས་རྗེས་བསྐྱངས། །རྨད་བྱུང་ཟབ་མོའི་ལམ་རྣམས་རྗེས་སུ་བསྟན། །འདི་དང་ཕྱི་མ་ཕན་བདེའི་ས་ལ་བཀོད། །ཚད་མེད་བཀའ་དྲིན་ཡང་ཡང་དྲན་པར་གྱུར། །གཉེན་གྱིས་འབྲེལ་པས་ཁྱེད་ལ་དད་མིན་ཏེ། །ངེས་པར་སངས་རྒྱས་ཡིན་པའི་ངེས་ཤེས་ཀྱིས། །ཁྱེད་ལ་བསྟོད་པ་ཅུང་ཟད་འདི་བགྱིས་པས། །དགེ་བས་བླ་མའི་ཞབས་དྲུང་སྐྱེ་བར་ཤོག །ཀྱེ་མ་བླ་མ་བཞུགས་པའི་ཞབས་དྲུང་དུ། །ཆོས་ཀྱི་བཀའ་དྲིན་ནོད་པའི་སྐལ་བས་དབེན། །སྐྱབས་མེད་བདག་ལ་ཐུགས་རྗེ་ཆེན་པོ་ཡིས། །ཡང་དག་རྟོགས་པའི་བློ་གྲོས་བསྐྱེད་དུ་གསོལ། ༈ །ཡང་སྨྲས་པ། ཚངས་པར་སྤྱོད་པའི་དགེ་བསྙེན་ཚུལ་འཛིན་པ། །བསོད་ནམས་དཔག་མེད་ལྡན་པའི་དབང་ཕྱུག་གི །ཤེས་བྱ་མ་ལུས་གཟིགས་པའི་རྩེ་མོར་ཕྱིན། །བློ་ཆེན་སྨྲ་བའི་དཔལ་ལ་མགོས་ཕྱག་འཚལ། །གཡོ་མེད་ཕྱག་རྒྱ་ཆེ་ལ་རོལ་པའི་ཐུགས། །མདོ་རྒྱུད་མན་ངག་ཆར་རྒྱུན་མི་ཆད་གསུང༌། །མཛུམ་མཛེས་མདངས་གསལ་མཚན་དཔེའི་སྐུ་མངའ་བ། །འགྲོ་བའི་སྐྱབས་གཅིག་བླ་མའི་ཞབས་ལ་འདུད། །རྒྱ་ཆེན་ཆོས་ཀྱི་སྒོ་རྣམས་མཁྱེན་པའི་མཐུས། །ཤེས་ལྡན་སློབ་མའི་སྒོ་གསུམ་ཚིམ་པར་མཛད། །མཁས་པའི་མཁས་པས་