[B:443]so/ / /des kyang / bla mas ston par mi spro na/ slar yang mchod pas mnyes par byas la/ lan gsum du gsol ba gdab ste/ bla ma lnga bcu par/ pus btsugs thal mo sbyar ba yis/ / /nyan sogs 'dod la gsol gsum gdab/ / /ces gsungs pas so/ / /gnyis pa ni/ legs so sbyin pa sngon du 'gro bas/ rgyud don rtogs dka' zhing / dam tshig dang sdom pa bsrung dka' la/ nyams na nyes pa che bas gnyis ka phung bar 'gyur ba'i tshul bshad de/ rdo rje phreng bar/ ji ltar seng ge'i 'o ma ni/ / /sa yi snod du bzhag mi bya/ / /de bzhin rnal 'byor chen po'i rgyud/ / /snod min dag la sbyin mi bya/ / /slob ma skad cig de la 'chi/ / /'di dang pha rol du ni phung / / /snod min man ngag rab bshad na/ / /slob dpon dngos grub nyams par 'gyur/ / /zhes pa'i don bshad/ de yang gsol ba 'debs na/ thog mar dbang bskur nas snod du rung bar byed dgos te/ phyag rgya chen po thig las/ dang por re zhig slob ma la/ / /dbang rnams lan gcig bskur ba yis/ / /de tshe gsang chen bshad pa yi/ / /nges par snod du gyur pa'o/ / /zhes gsungs so/ / /de nas dug la sngags kyis btab pa bzhin du/ slob ma'i rgyud dbang bskur bas dag par byas nas rgyud bshad de/ phyag rgya chen po thig le las/ ji ltar dug la rang sngags kyis/ / /dag par byas nas bdud rtsir 'gyur/ / /de bzhin slob ma dbang sogs kyis/ / /lus ni dri ma med par 'gyur/ / /zhes so/ / /de ltar rgyud dag par byas nas bshad thabs kyi man ngag las