[A:69]dang | dri za'i grong khyer dang / chu shing gi phung po bzhin du snying po med pa dang yid brtan du mi rung ba dang kem pa'i 'bras bu ltar nyes dmigs mtha' yas pa'i 'byung gnas su gzigs te thar pa mya ngan las 'das pa'i bde ba dam pas thugs 'phrogs pa'i nges 'byung drag po yang dang yang du thugs la 'khrungs nas gzhon nu dgung lo bdun brgyad las mi mang pa'i dus nyid du khyim nas khyim med par rab tu byung ste/ sangs rgyas bcom ldan 'das kyis legs par gsungs pa'i chos 'dul ba thams cad yod par smra ba'i sde pa'i nang du zhugs nas mtshan nam mkha' 'od zer zhes bya bar btags te/ sku'i lhun po ngur smrig dri ma med pa'i mtshams sprin gyis mdzes par byas pa'i rgyal ba'i bstan pa rin po che'i nam mkha' phan bde'i 'od zer gyis khyab par mdzad do/ /de ma thag nas rab tu byung ba rnams kyis bslab par bya ba'i dgag bsgrub gnang gsum gyi bslab gzhi rnams la legs par sbyangs nas ji ltar thugs su chud pa mtha' dag phyag len la thebs pa'i sgo nas tshus khrims kyi rgya mtsho chen po nyes ltung gi rnyog pas rnam pa kun tu dben par mdzad cing / rang nyid bstan pa rin po che la zhugs shing nyes pa dang bral ba'i bde ba brnyes pa nyid kyis rkyen byas nas/ mtha' med pa'i sems can 'phral dang yun gyi bde bas phongs pa dang sdul bsngal brgya phrag gis rtag tu mnar ba'i tshul la dmigs pa med pa'i snying rje chen po yang dang yang du 'khrungs nas/ da ni gzhan phan byang chub kyi sems la legs par bslab par bya na theg pa chen po'i bsam sbyor bla na med pa rnams ston pa'i gsung rab la thog mar bslab par bya'o snyam du dgongs nas byang chub