[A:108]
dang po ni/ rgyal ba'i 'byung gnas ston pa rin po ches/ thub bstan tshangs spyod mchog la rag las par/ gzigs nas ngur smrig 'dzin pa'i gtsug rgyan du/ slar yang skye ba bzhes pa de la 'dud/ zhes pa ste/ 'brom ston pa rgyal ba'i 'byung gnas zhes bya ba/ sngon sangs rgyas bcom ldan 'das kyis mdo mya ngan chung bar/ byang phyogs su grong khyer rdo can bya bar/ khyim bdag ral pa 'dzin zhes bya bas/ nga'i bstan pa rgyas par byed do zhes/ mnga' bdag khri ral du lung bstan pa'i 'jug tu/ yang phyogs der/ dge bsnyen chos 'phel zhes bya bas kyang / nga'i bstan pa la bya ba khyad par can byed do zhes lung bstan cing | rje btsun spyan ras gzigs kyi rnam 'phrul du yang dang yang du gsungs pa| dbu ru byang stod kyi sar 'brom gyi gdung las 'khrungs shing / se ston la sogs pa'i yongs 'dzin du ma mnyes par byas nas/ mkhas pa'i go 'phang brnyes zin pa gcig rgya gar shar phyogs bhaM ga ka'i rgyas rigs su 'khrungs pa/ gnas lnga rig pa'i paNDita chen po zla med pa byams snying rje byang chub kyi sems kyi thugs rgyud lhag par bltams pa/ rje btsun spyan ras gzigs dang rje btsun ma sgrol mas lung bstan nas bod du byon pa'i jo bo a ti sha mnga' ris nas bsubsus ste/ snye thang 'or du mya ngan las ma 'das kyi bar du 'bral med du bsten| chu bo sum 'dres kyi gdam ngag khyad par can lam mtha' dag gi lus yongs su rdzogs pa byang chub lam gyi rim pa la thugs dam snying por mdzad de/ rgyal ba de'i rgyal tshab mdzad nas chos kyi rgyal srid rdzogs par bzung ste/ byang ra sgreng gi gdan sa chen po btab nas/ theg chen byang chub kyi sems rnam pa