ཁྱད་པར་གྱིས་དཔལ་དུས་ཀྱི་འཁོར་ལོའི་རྒྱུད་འགྲེལ་པ་དང་བཅས་པ། སཾ་སྐྲྀ་ཏའི་གླེགས་བམ་གྱི་སྟེང་ནས། མཁས་པའི་དབང་པོ་ཉིད་ཀྱིས་གསུངས་ཤིང་། ཁོ་བོའི་ཤོང་འགྱུར་བཀྲམ་ནས། འགྱུར་མི་བཅོས་སུ་མི་རུང་བ་རྣམས་ལ་ཞུ་ཆེན་ཡང་ཞུས་ལ། སྒྲ་དང་སྡེབ་སྦྱོར་ལ་སོགས་པའི་བཤད་པ་སཾ་སྐྲྀ་ཏའི་སྟེང་ནས་དཔྱད་དགོས་པ་རྣམས་ལེགས་པར་ཞུས་ཤིང་། གླེགས་བམ་ལ་མཆན་བུའང་བཏབ་པ་ཡིན་ནོ།། སྒྲ་དང་། སྙན་ངག་དང་། སྡེབ་སྦྱོར་དང་། མངོན་བརྗོད་རྣམས་ལ་བློའི་སྣང་བ་ཤར་བ་ནི། དམ་པ་འདི་ཉིད་ཁོ་ནའི་མཐུ་ཡིན་ནོ།། བྱང་ཆུབ་སེམས་དཔའ་རྡོ་རྗེ་སྙིང་པོས་མཛད་པའི་ཀྱེའི་རྡོ་རྗེའི་འགྲེལ་པ་དང་། ནཱ་རོ་འགྲེལ་ཆེན་གཉིས་དང་། སློབ་དཔོན་ཆེན་པོ་དཔེ་མེད་འཚོ་དང་། སློབ་དཔོན་ར་ཝི་ཤྲཱིས་མཛད་པའི་སྦྱོར་བ་ཡན་ལག་དྲུག་གི་མན་ངག་རྩ་འགྲེལ་རྣམས་ལ་ཡང་། ཁོ་བོས་ཞུས་ནས། ཞུ་ཆེན་ཤིན་ཏུ་དག་པར་མཛད་པ་ཡོད་ལ། འགྱུར་སྟན་ཡང་ཁོ་བོ་ལ་གནང་ནས་ཡོད་དོ།། ཡང་ཆོས་རྗེ་འཇམ་གསར་ལ། བླ་མ་རྒ་ལོས་འབྲོ་འགྱུར་ལུགས་ཀྱི་བཤད་པ། དབང་གདམས་ངག་རྣམས་ཐོབ་པས། རྒ་ལོ་ནས་བརྒྱུད་པ་རྣམས་ལ་ཡང་རྭ་འབྲོ་གཉི་གའི་ལུགས་ཚང་བར་བཞེད་དོ།། ཡང་། ཆོས་རྗེ་མངོན་གྲྭ་པ་ལ། ཀུན་མཁྱེན་འཛིམས་པ་རིན་ཤེས་གསན་ལ། དེ་ཉིད་དང་བླ་མ་རྒ་ལོ་གཉི་ག་ལ་འབྲོ་ལུགས་རྭ་ལུགས་ཀྱི་སྐོར་ཚང་བར་དབུས་པ་དགེ་སློང་ཚུལ་ཁྲིམས་དར་གྱིས་ཞུས་ལ། དེ་ཉིད་ལ་བླ་མ་ཆེན་པོ་དུས་འཁོར་བ་ཡེ་ཤེས་རིན་ཆེན་གྱིས་ཞུས་པས། ལུགས་གཉི་གའི་གདམས་པས་བརྒྱན་པ་ཡིན་ནོ་ཞེས་བླ་མ་དམ་པ་ཡོན་ཏན་རྒྱ་མཚོ་གསུང་ངོ་།། ཡང་། རྗེ་བཙུན་མན་ལུང་གུ་རུ་ནས་བརྒྱུད་པའི་བཤད་བཀའ་དང་། གདམས་ངག་རྣམས་ནི། བླ་མ་ལོ་ཙཱ་བ་གྲགས་པ་རྒྱལ་མཚན། བླ་མ་གྲུབ་པ་དཔལ་བཟང་པོ། བྱང་ཆུབ་སེམས་དཔའ་ཆེན་པོ་རྒྱལ་བ་ཡེ་ཤེས། ཆོས་རྗེ་ཡོན་ཏན་རྒྱ་མཚོ་རྣམས་ལས་བརྒྱུད་དེ་ཐོབ་པོ།། ལོ་ཙཱ་བ་ཆེན་པོ་ཤུད་ཀྱེ་ཉིད་ཀྱིས་བསྒྱུར་བའི་དུས་འཁོར་དང་། པཎྜི་ཏ་མང་པོ་ལ་གསན་པའི་གཏམ་རྒྱུད། ཞལ་གདམས་རྣམས་ཀྱང་ཆོས་རྗེ་འདི་ཉིད་ལས་ཐོབ་པོ།། དེ་ལྟར་འབྲོ་བའི་བླ་མའི་ལོ་རྒྱུས་རྣམས་ནི། བླ་མ་ཡུ་མོའི་གསུང་ལ། སྲས་དྷརྨ་ཤྭ་རས་ཟིན་རིས་སུ་བྱས་པ་ལ། ནམ་མཁའ་འོད་དང་། གྲུབ་ཐོབ་སེ་མོ་ཆེས་རྒྱས་པར་མཛད་པ་བཞིན་བྲིས་ཤིང་། རྭ་ལུགས་ཀྱི་ལོ་རྒྱུས་རྣམས་ནི། བླ་མ་རྒ་ལོ་དང་། བླ་མ་ཡེ་ཤེས་རིན་ཆེན་པས་མཛད་པ་བཞིན་བྲིས་ལ། ཁོ་བོའི་བླ་མ་དམ་པ། བཀའ་བསྟན་བཅོས་དུ་མ་ལ་དབང་བསྒྱུར་བ་ལོ་ཙཱ་བ་ཆེན་པོ་མཁན་ཆེན་བུ་སྟོན་ཞབས་ཀྱིས་མཛད་པ་ལས་ཀྱང་བྲིས་ཤིང་། ཤུད་ཀྱེ་ལོ་ཙཱ་བའི་གསུང་ལ་བླ་མ་གྲུབ་མཆོག་པས་ཟིན་བྲིས་མཛད་པ་ལས་ཀྱང་བྲིས་སོ།། གཞན་རྣམས་ནི། དཔལ་ལྡན་བླ་མ་ཡོན་ཏན་རྒྱ་མཚོ་པ་དང་། ཆོས་ཀྱི་རྗེ་ཆེན་པོ་ཉིད་དང་། སྒྲ་བསྒྱུར་རྣམས་ཀྱི་མཆོག་འཇིག་རྟེན་གྱི་མིག་དམ་པ། དཔལ་ལྡན་བློ་གྲོས་བརྟན་པའི་གསུང་ལས་འབྱུང་བ་བཞིན་དབྲི་བསྣན་མེད་པར་བྲིས་པ་ཡིན་ནོ།། ཆོས་རྗེ་རིན་རྩེ་དང་། དེ་ཉིད་ཀྱི་རིང་ལུགས་པ་ཞང་རྡོ་རྗེ་རིན་ཆེན་གྱི་སློབ་མའི་ཐུ་བོ། བླ་མ་འཇམ་དབྱངས་འཁོན་སྟོན་པ་ལས་ཀྱང་། དཔལ་དུས་ཀྱི་འཁོར་ལོའི་དབང་ཡོངས་སུ་རྫོགས་པ་དང་། རྡོ་རྗེ་སློབ་དཔོན་གྱི་དབང་གི་སྔོན་དུ་འབྲོ་འགྱུར་གྱི་རྒྱུད་དང་། གནས་པ་བརྒྱད་ཅུ་རྩ་གཅིག་གི་ལུང་ཡང་ཐོབ་པོ།།
༢༽བསྡུས་བའི་རྒྱུད།
eds: བསྡུས་པའི་རྒྱུད་ཇི་ལྟར་བསྡུས་པའི་ཚུལ་རྣམས་ནི་འགྲེལ་པ་ཆེན་པོ་ཉིད་དུ་གསུང་བར་འགྱུར་ལ། ཞེས་གཞུང་འདི་ཉིད་དུ་གསུངས་པ་ལྟར། བསྡུས་རྒྱུད་ཇི་ལྟར་བསྡུས་པའི་ཚུལ་ནི་གཞུང་གཞན་དུ་གསལ་བ་བཞིན་འདིར་བཀོད་མི་འདུག ས་བཅད་འདི་རྩོམ་སྒྲིག་པས་ཀློག་མཁན་རྣམས་ཀྱིས་ས་བཅད་འཛིན་བདེ་བའི་ཕྱིར་དུ་མཚམས་འདིར་ཁ་སྐོང་གི་ཚུལ་དུ་བཅུག་གོ།
ཐ་མར་དགེ་བ་མཇུག
མཇུག་བྱང་།
འགའ་ཞིག་བླ་མའི་རྣམ་ཐར་འདི་ཉིད་ལས།། རྒྱས་པར་བྱ་བར་རིགས་ཞེས་སྨྲ་ན་ཡང་།། རྒྱུད་འགྲེལ་གཞུང་ཚན་ཤིན་ཏུ་ཆེ་བའི་སླད།། འདི་ཙམ་འཚམ་ཞེས་སྒྲོགས་པ་མང་བ་དང་།། བདག་ཉིད་རང་ཡང་དེ་ལྟར་སེམས་པའི་ཕྱིར།། རགས་པ་འདི་ཙམ་སློབ་མ་དམ་པ་འགས།།