།སངས་རྒྱས་པ་ལ་བཞི་པ་དང་། །ལྔ་པ་ཐུབ་པའི་དགོངས་པ་མེད།། ཅེས་ཀྱེའི་རྡོ་རྗེའི་འགྲེལ་པར་གསུངས་པ་བཞིན་སོ་སོ་ཐར་པའི་བསླབ་པ་དང་ལྡན་པས། གྲུབ་མཐའ་བཞི་དང་ཐེག་པ་གསུམ་ལ་མཁས་པར་བྱ་བ་སྟེ། དེ་དག་གི་དགོངས་པ་མ་ཤེས་ན་དུས་ལས་ཐམས་ཅད་མཁྱེན་པའི་ལམ་ལས་ཉམས་པར་གསུངས་སོ།། འདིས་ནི་ཐེག་པ་དགུའི་རྣམ་གཞག་འདོད་པའང་བསལ་བ་ཡིན་ནོ།།
༼༢༽རྣལ་འབྱོར་རྒྱུད་བྱེ་བྲག་ཏུ་བཤད་པ།
དེ་ལྟར་གྲུབ་མཐའ་རྣམ་པ་བཞིའི་ནང་ནས་དབུ་མ་དང་། ཐེག་པ་གསུམ་གྱི་ནང་ནས་ཐེག་པ་ཆེན་པོ་མཆོག་ཡིན་པ་བཞིན་དུ། རྒྱུད་སྡེ་བཞིའི་ནང་ནས་ཀྱང་རྣལ་འབྱོར་ཆེན་པོ་མཆོག་ཡིན་ནོ།། དེའང་རྩ་བའི་རྒྱུད་དང་བསྡུས་པའི་རྒྱུད་གཉིས་ལས།
༡༽རྩ་བའི་རྒྱུད།
དཔལ་ལྡན་འབྲས་ཕུང་དུ། བཅོམ་ལྡན་འདས་ཉིད་ཀྱིས་རྩ་བའི་རྒྱུད་ཇི་ལྟར་གསུངས་པའི་ཚུལ་དང་། ཤམྦྷ་ལའི་ཡུལ་དུ་འཕགས་པ་འཇམ་དཔལ་གྱི་སྤྲུལ་པ་མིའི་དབང་པོ་གྲགས་པ་ཉིད་ཀྱིས། བསྡུས་པའི་རྒྱུད་ཇི་ལྟར་བསྡུས་པའི་ཚུལ་རྣམས་ནི་འགྲེལ་པ་ཆེན་པོ་ཉིད་དུ་གསུང་བར་འགྱུར་ལ།
༡ ཤམྦྷ་ལ་ནས་འཕགས་ཡུལ་དུ་དར་ཚུལ།
ཤམྦྷ་ལའི་ཡུལ་ནས་འཕགས་པའི་ཡུལ་དུ་ཇི་ལྟར་དར་བའི་ཚུལ་ནི།
(1) འབྲོ་ལུགས།
དུས་ཞབས་པ་ཆེན་པོ།
འབྲོ་པའི་ལུགས་ཀྱིས། རིགས་ལྡན་སེངྒེས་ཆོས་སྟོན་པའི་དུས་སུ། གཤིན་རྗེ་གཤེད་ཀྱི་རྣལ་འབྱོར་པ་ཡབ་ཡུམ་གཉིས་ཀྱིས་རྒྱུད་ནས་འབྱུང་བ་བཞིན། རིགས་ཀྱི་སྲས་བསྐྲུན་པའི་ཆོ་ག་བྱས་པས། ཁྱེའུ་ཞིག་འཁྲུངས་པ་ཆེར་སྐྱེས་པ་དང་། ཤམྦྷ་ལ་ན་བྱང་ཆུབ་སེམས་དཔའ་དངོས་སུ་ཆོས་སྟོན་པ་ཡོད་པ་ཐོས་ནས། ཆོས་ཉན་དུ་བྱོན་པ་ན། མྱ་ངམ་གྱི་ཐང་ལ་ཟླ་བ་བཞི་འགྲོ་དགོས་པས་སྲོག་གི་བར་ཆད་དུ་འགྲོ་བར་རིགས་ལྡན་གྱི་མངོན་པར་ཤེས་པའི་སྟོབས་ཀྱིས་མཁྱེན་ནས་མྱ་ངམ་གྱི་ཐང་ཐོན་པར་བྱོན་ཏེ། བླ་ན་མེད་པའི་རྒྱུད་སྡེ་རྣམས་བྱང་ཆུབ་སེམས་དཔའི་འགྲེལ་པ་སྐོར་གསུམ་བཞིན། ཟླ་བ་བཞིའི་བར་དུ་གསུངས་པ་ན་བུམ་པ་གང་བྱོའི་ཚུལ་དུ་མཁྱེན་པས། འཇམ་དཔལ་གྱི་སྤྲུལ་པ་ཡིན་པར་གྲགས་ཤིང་མཚན་ཡང་དུས་འཁོར་ཞབས་ཞེས་གྲགས་སོ།།
དུས་ཞབས་གཉིས་པ།
དེ་དུས་དགེ་སློང་བློ་ཤིན་ཏུ་རྟུལ་བ་ཞིག་གིས་ཤེས་རབ་འཕེལ་བར་འདོད་པས་འདོད་པའི་ལྷ་ལ་གསོལ་བ་བཏབ་པ་ལས། ལྷས་རྨི་ལམ་དུ་བསྟན་པ་ལ་བརྟེན་ཏེ། བྱི་རུ་ལ་ལྷ་མོ་ཀུ་རུ་ཀུལླེའི་སྐུ་ཚོན་གང་པ་བྱས་ཏེ་བུད་མེད་ཀྱི་རོའི་ཁར་བཅུག་ནས། རྒྱབ་ཏུ་དཀྱིལ་མོ་ཀྲུང་བཅས་ནས་ཞག་བདུན་བསྒྲུབ་པས་ཁ་གྱེན་དུ་ཕྱོགས་ཏེ། ཅི་འདོད་ཅེས་ཟེར་བ་ལ་མཐོང་ཚད་ཟིན་པར་འདོད་བྱས་ཀྱང་གྲུབ་པ་ཡིན་པ་ལ། སེམས་ཞུམ་པའི་དབང་གིས་བྲིས་ཟིན་ཚད་ཟིན་པར་འདོད་དོ་ཞེས་སྨྲས་པས། དེ་ལྟར་གྱུར་ཅིག་ཅེས་བྱུང་བ་ཙམ་གྱི་མོད་ལ་དེ་ལྟར་གྲུབ་པ་པཎྜི་ཏ་ངག་གི་དབང་ཕྱུག་གྲགས་པ་ཞེས་བྱ་བ། ཁ་སར་པ་ཎིའི་གཙུག་ལག་ཁང་དུ་གནས་པ་དེ་ཡིས། སློབ་དཔོན་དུས་འཁོར་ཞབས་ལ་རྒྱུད་དུ་ཤེས་དྲིས་པ་ལ། སློབ་དཔོན་གྱིས་ལན་གསུངས་པས་རྒྱུད་ཀྱི་མཚན་ཙམ་ཡང་བཟུང་བར་མ་ནུས་སྐད། དེ་ཉིད་ལ་སློབ་མ་མང་དུ་བྱུང་བ་ལས་ཕལ་ཆེར་རྣལ་འབྱོར་པར་གྱུར། བཤད་པའི་སྲོལ་འཛིན་པ་རྒྱལ་སྲས་ནཱ་ལེནྡྲ་པ་དུས་འཁོར་ཞབས་གཉིས་པ་ཞེས་གྲགས་པ་དེ་ཉིད། སྔ་མའི་ཡོན་ཏན་དང་མཚུངས་པ་ཡིན་ནོ།།
པཎ་ཆེན་ཟླ་བ་མགོན་པོ།
དེའི་དུས་སུ་ཁ་ཆེར་བྲམ་ཟེ་ཞིག་གི་བུ། སོ་མ་ནཱ་ཐ་ཞེས་བྱ་བ། བློ་ཤིན་ཏུ་རྣོ་བ་ཞིག་བྱུང་བས་ཡབ་མུ་སྟེགས་པ་ཡིན་པས་དེའི་གཞུང་ལུགས་རྣམས་ལོ་བཅུ་གཉིས་ལ་མཁྱེན། ཡུམ་སངས་རྒྱས་པ་ཡིན་པས་ངའི་ཆོས་ལུགས་ཀྱང་སློབ་དགོས་ཞེས་ཟེར་ནས། ཁ་ཆེ་བྲམ་ཟེ་ཞབས་ཞེས་བྱ་བའི་པཎྜི་ཏ་ལ་ཆོས་སློབ་ཏུ་བཅུག་གོ།། སོ་མ་ནཱ་ཐ་དེ་གཟུགས་ཤིན་ཏུ་མཛེས་པས། པཎྜི་ཏའི་སྲས་མོ་ན་རེ་ང་དང་ལྷན་ཅིག་འགྲོགས་ཏེ་ཆོས་ཉན་དགོས་ཟེར་བ་ལ། དེ་ལྟར་ཁས་བླངས་ནས་ཆོས་མང་པོ་གསན་ནོ།། དེ་དུས་སུ་དུས་ཞབས་པ་ཆེན་པོའི་སློབ་མ་དུལ་བའི་འབྱུང་གནས་བློ་གྲོས་ཀྱིས་དབང་མདོར་བསྟན་དང་དབང་རབ་བྱེད་ཀྱི་གླེགས་བམ། བྲམ་ཟེ་ཞབས་ལ་བསྐུར་བྱུང་བ་ཟླ་བ་མགོན་པོ་ལ་བསྟན་ཏེ་གཟིགས་པས། ཤིན་ཏུ་མོས་ནས་མ་ག་དྷཱར་བྱོན་པས་དུས་འཁོར་ཞབས་རྣམ་གཉིས་དང་མཇལ་ནས།