tog gi chun bu dang / tshig gi gter la sogs pa yang tshul bzhin du mi shod par snang bas/ 'di dag shes pa cig ci nas kyang gyis la shog cig ces gsungs nas/ de dag gi dpe dang / gser srang lnga/ dar yug bcu rnams gnang ste/ rten 'brel yod pas do nub rje btsun gong ma'i gzims khang / dpe khang du nyol la song zhig ces gsungs nas brdzangs so// shong ba'i thugs dgongs la skye bas thob pa'i blo gros ni phun sum tshogs/ sbyor bas byung ba'i nan tan ni mchog tu gyur na legs bshad sar pa mang du ci ste bsgyur bar mi nus snyam du dgongs te/ bla ma dam pa'i gzim g.yog pa mdo smad pa blo gros rgyal po dang 'grogs te/ bal yul du byon nas paNDi ta chen po ma hen dra bha dra sa dbang bzang po 'i drung du rig pa'i gnas chung ba lnga sgra/ snyan ngag /sdeb sbyor/ zlos gar/ mngon brjod ste bslabs shing / khyad par sgra rig pa la shin tu byang bar mdzad nas gdan sa chen por byon te/ bla ma dam pa'i bka' bzhin/ dpal dus kyi 'khor lo'i rgyud 'grel pa dang bcas pa shin tu rnam par dag pa'i 'gyur mdzad nas/ slar yang rdo rje gdan du/ ma hA bo dhi mchod pa dang / bskor ba la byon te/ paNDi ta chen po lakShmI ka ra spyan drangs nas/ byang chub sems dpa'i rtogs pa brjod pa dpag bsam 'khri shing dang / klu rnams kun tu dga' bar byed pa'i zlos gar dang / snyan ngag me long dang / 'jig rten dbang phyug gi bstod pa brgya pa dang / 'phags pa 'jam dpal gyi bstod pa br-itta mA la'i bstod dang / tsandra pa'i mdo la sogs pa sngon gangs can du ma 'gyur ba rnams sar du bsgyur zhing / a ma ra ko Sha la sogs pa yang mchan bus gsal bar mdzad nas/ rig pa'i gnas 'di dag shin tu rgyas par mdzad do// 'phags pa rin po ches kyang / sde snod 'dzin pa shong gi lo tsA ba'i snyan du gsol pa/ zhes pa'i phrin yig mdzad pa na/ dpal dus kyi 'khor lo'i rgyud 'grel pa dang bcas pa rgya che la zab cing gting dpag par dka' la tshig brling zhing / sdeb sbyor byings che bas/ chen po rnams kyis kyang nyams su bde bar lon dka' bas/ sngon byung ba'i lo tsA ba dag gis kyang ma 'gyur ba dang / log pa dang / rnam grangs gzhan dang / phyogs re ba dang / thal bar bsgyur ba la sogs pa de dag khyed kyis legs par khong du chud cing / mtha' gcig tu nges te/ zhu chen mdzad pa'i glegs bam dang / klu rnams rab tu dga' bar byed pa'i zlos gar mthong bas/ dga' ba dang rjes su yi rang ba khyad par can skyes/ zhes pa la sogs pas rab tu bsngags shing / sgra bsgyur rnams kyi gtsug gi nor bur gyur pa yin no// 'di nyid kyis bsgyur ba'i dpal dus kyi 'khor lo'i rgyud 'grel pa dang bcas pa'i 'gyur stan/ mkhas pa'i dbang po de nyid kyis phyag ris su mdzad pa'i glegs bam yang kho bo'i lag tu byung zhing bzhugs so// de nyid las de nyid kyi gcung po shong ston lo tsA ba blo gros brtan pa zhes grags pa kye'i rdo rje'i 'grel pa TaM ka dA sha dang / sdom 'byung gi 'grel pa padmo can dang / gshin rje gshed dmar po'i rgyud la sogs pa gzhi 'gyur du'ang mang du bsgyur zhing / zhu chen yang du ma mdzad la/ 'phags pa rin po che'i slob ma'i thu mor gyur cing / se chen rgyal pos kyang bla mar bkur ba gcen po'i yon tan la sgrun du rung ba yod pa