de nyid kyis zhus la/ de dag gnyis ka la/ mang gar khra tshang du sku 'khrungs shing / 'gro ba'i mgon po 'phags pa la rab byung zhus la/ mtshan mchog ldan legs pa'i blo gros dpung rgyan mdzes pa'i tog ces/ rang nyid kyis 'dogs par zhus shing btags la/ phyis lo tsA ba mchog ldan zhes grags pa/ gshin rje gshed dmar po'i rgyud dang / ral gcig ma dmar mo'i sgrub thabs la gzhi 'gyur mdzad cing / bod kyi yul du 'gyur ba'i bka' dang bstan bcos dang / dbang dang gdams ngag phal mo che'i lung dang bka' mnga' ba/ dge ba'i bshes gnyen mang po'i bla mar gyur pa de nyid kyis gsan pa yin no// de nyid la skyi ston 'jam pa'i dbyangs kyis gsan la/ de nyid la chos kyi rje chen po nyid kyis gsan pa yin no// yang dpal ldan bla ma dam pa sdee snod dang rgyud sde mang po la dbang 'byor zhing / tshad ma sde bdun la shin tu mkhas par grags pa/ dpal ldan sengges kyang / lo tsA ba mchog ldan nyid la gsan la/ bla ma shes rab sengge pa las/ rwa 'gyur yang gsan mod kyi/ bla ma chen po kun dga' rgyal mtshan dpal bzang pos zhus pa'i tshe/ rwa 'gyur las mchog tu dgongs te/ shong 'gyur gyi steng nas gsungs shing / de'i dus su kho bos kyang bshad pa cha lag dang bcas pa dang dbang yongs su rdzogs par thob po// yang mkhas pa'i dbang po lo tsA ba chen po/ dpang dpal ldan blo gros brtan pa las kyang thos te/ de yang spyad lungs kyi 'um bu gyam zhes bya bar sku 'khrungs nas/ mkhan chen gser khang pa chen po'i drung du rab tu byung zhing / 'dul ba mdo rtsa gsan nas dgung lo bcu gcig pa la rdzogs par thugs la gsungs shing / byang bar mdzad de tsha snar mkhan chen stag sde pa sengge rgyal mtshan dang / de nyid kyi sras kyi thu bo stag sde ri phug gi mkhan po mdzad pa'i/ mkhan chen shes rab dpal ba'i drung du byon nas/ phar tshad mngon gsum la sogs pa mtshan nyid kyi chos rnams la shin tu mkhas par mdzad cing / grwa skor yang mdzad nas/ lo tsA ba mchog ldan gyi drung du byon te dpal dus kyi 'khor lo shong 'gyur dang / gzhan yang bka' bstan bcos mang po'i bka' lung rnams zhus la/ snyan ngag me long dang / klu kun tu dga' ba'i zlos gar la sogs pa dang / sgra ka lA pa'i ming le dang po yar bcad gsan cing byang bar mdzad do// bla ma rong pa shes rab sengga pa la'ang gshin rje gshed skor gsum gyi dbang dang / de rnams kyi chos skor/ dpal dus kyi 'khor lo rwa 'gyur rnams gsan pa yin no// de nas bal yul du lan gsum byon te/ ma dhu paNDi ta dang / rA ma paNDi ta dang / rgya gar shar phyogs kyi tsu Da paNDi ta rnams la rig pa'i gnas mang du bslabs shing / khyad par gyis sgra rig pa la shin tu byang bar mdzad nas sgra mdo ka lA pa dang / de'i 'grel pa bgrod dka' sengges mdzad pa dang / slob ma la phan pa dang / yi ge'i mdo dang / tshad ma rgyal dbang blo dang / rtog ge'i skad dang / 'brel pa mdor bstan dang / 'phags pa 'jam dpal gyi bstod pa br-itta mA la'i mjug dang / rdo rje snying po rgyan gyi rgyud kyi mjug dang / mdor bsdus dang po'i 'grel bshad mi g.yo snying pos mdzad pa dang / sbyor ba brgya pa la sogs pa gzhi 'gyur du ma'ang mdzad cing / bka' dang bstan bcos du ma la zhu chen mdzad la/ mchan