ye shes bsam gyis mi khyab pa'i yul la 'jug pa bstan pa dang / sangs rgyas phal po che dang / langkar gshegs pa la sogs pa rnams yin no// 'di rnams kyis brjod bya'i don ji ltar ston pa ni blo gros dang ldan pa rnams kyis sngar gyi grub mtha' ngan pa'i bag chags kyis ma bslad par blo gzu bor gnas pas bltas na rtogs par 'gyur la/ de dag blta bar mi nus pa rnams kyis ni/ chos kyi rje yis mdzad pa'i bstan pa'i spyi 'grel bltas na yang rags pa tsam rtogs par 'gyur ro// 'khor lo gsum yang drang don dang nges don gang yin pa dang / legs par rnam par phye ste gsal bar ston pa yin min gyi khyad par la sogs pa ni/ dgongs pa nges par 'grel pa'i mdor/ de nas bcom ldan 'das la byang chub sems dpa' don dam yang dag 'phags kyis 'di skad ces gsol to// bcom ldan 'das kyis dang por yul wA rA Na sI drang srong smra ba lhung zer ri dwags kyi nags su/ nyan thos kyi theg pa la yang dag par zhugs pa rnams la 'phags pa'i bden pa bzhi rnam par bstan pas/ chos kyi 'khor lo ngo mtshar rmad du byung ba sngon lhar gyur pa'am mir pa/ sus kyang chos dang mthun par 'jig rten du ma bskor ba gcig rab tu bskor te/ bcom ldan 'das kyis chos kyi 'khor lo bskor ba de yang bla na mchis pa skabs mchis pa drang ba'i don rtsod pa'i tshig gi zer gzhi'i gnas su gyur pa lags la/ bcom ldan 'das kyis chos rnams kyi ngo bo nyid ma mchis pa nyid las brtsams/ skye ba ma mchis pa dang 'gag pa ma mchis pa dang gzod ma nas zhi ba nyid dang / rang bzhin gyis yongs su mya ngan las 'das pa nyid las brtsams nas/ theg pa chen po la yang dag par zhugs pa rnams la stong pa nyid smos pa'i rnam pas/ ches ngo mtshar rmad du byung ba'i chos kyi 'khor lo gnyis pa bskor te/ bcom ldan 'das kyis chos kyi 'khor lo bskor ba de yang bla na mchis pa skabs mchis pa drang ba'i don rtsod pa'i tshig gi zer gzhi'i gnas su gyur pa lags kyi/ bcom ldan 'das kyis chos rnams kyi ngo bo nyid ma mchis pa nyid las brtsams/ skye ba ma mchis pa nyid dang 'gag pa ma mchis pa nyid dang gzod ma nas zhi ba nyid dang / rang bzhin gyis yongs su mya ngan las 'das pa nyid las brtsams nas theg pa thams cad la yang dag par zhugs pa rnams la/ legs par rnam par phye ba dang ldan pa shin tu rab tu ngo mtshar la ches ngo mtshar rmad du byung ba'i chos kyi 'khor lo gsum pa bskor te/ bcom ldan 'das kyis chos kyi 'khor lo bskor ba 'di ni bla na ma mchis pa skabs ma mchis pa nges pa'i don lags te rtsod pa'i tshig gi zer gzhi'i gnas su gyur pa ma lags so// zhes gsungs so// paNDi ta chos kyi bshes gnyen la sogs pa rnams kyis lung 'di ni rnam par 'khyams pa'o zhes bshad pas gnod do zhe na/ de ni ma yin te/ bcom ldan 'das dang / paNDi ta chos kyi bshes gnyen gang dpang du bya ba mkhyen par mdzod cig/ //
gnyis pa/ sngags kyi theg pa/
gnyis pa sngags kyi theg pa la yang / bsdus pa'i rgyud 'ga' zhig dang sbas pa'i rgyud rnams kyi rjes su 'brang ba'i rgya gar ba'i 'grel pa 'ga' zhig las/ rgyud sde'i dbye ba gsum dang lnga dang drug la sogs pa'i rnam gzhag mdzad pa'ang snang mod kyi/ grags che zhing don la gnas pa bzhir nges te/ bya ba'i rgyud dang /