བོད་ནང་ཁུལ་དུ་འཁྲུག་རྩོད་ཁོ་ན་ཡོད་པ་ལས། བོད་ཀྱི་བླ་དཔོན་ཚོ་ཟུང་སྦྲེལ་གྱིས་ཕྱི་ནས་རང་རང་གི་རྒྱབ་རྟེན་རེ་བཙལ་ཏེ། དེ་ལ་བརྟེན་ནས་ཆེད་དུ་ཆོས་སྲིད་ཀྱི་ཕྱོགས་རེས་ཆེས་ཆེར་སྤེལ་མེད་པ་དེ་ཡིན། དཔེར་ན་རང་རེ་བོད་ཀྱི་ལོ་རྒྱུས་ཐོག་སྤྲུལ་པའི་སྐུ་ངོས་འཛིན་བྱེད་པའི་སྲོལ་ཡང༌། ཉང་རལ་ཉི་མ་འོད་ཟེར་འདས་ནས་མི་ལོ་དགུ་བཅུ་གོ་བདུན་པ། བོད་ཀྱི་རབ་བྱུང་ལྔ་པའི་ས་ཕོ་བྱི་བའི་ལོ། སྤྱི་ལོ་ ༡༢༨༨ ལོར་ཀརྨ་པ་སྐུ་འཕྲེང་གསུམ་པ་རང་བྱུང་རྡོ་རྗེ་ཀརྨ་པཀྵིའི་ཡང་སྲིད་དུ་གྲུབ་ཐོབ་ཨོ་རྒྱན་པས་ངོས་འཛིན་གནང༌། དེས་ན་བོད་དུ་སྤྲུལ་སྐུ་ངོས་འཛིན་བྱེད་པའི་སྲོལ་དེ་ཐོག་མར་བཀའ་བརྒྱུད་པ་ལ་བྱུང༌། དེ་ནས་རིམ་བཞིན་རྙིང་མ་དང༌། ས་སྐྱ། དགེ་ལུགས་བཅས་སུ་སྤྲུལ་སྐུ་ངོས་འཛིན་བྱེད་པའི་སྲོལ་དེ་ཕན་ཚུན་འགྲན་པ་ལྟ་བུའི་དར་ཁྱབ་བཏང་སྟེ་མཐར་སྤྲུལ་སྐུ་ཆེ་འབྲིང་ཆུང་གསུམ་དང་། བླ་བྲང་ཆེ་འབྲིང་ཆུང་གསུམ་གྱིས་བོད་ཡུལ་གྱི་མཐའ་དབུས་ཀུན་ཁེངས་པ་ལྟ་བུ་ཞིག་ཏུ་གྱུར་པ་རེད། སྤྱིར་ཡང་བོད་དུ་གྲུབ་མཐའ་འདྲ་མིན་བྱུང་བའང༌། བསྟན་པ་ཕྱི་དར་གྱི་རྗེས་ལ་བྱུང་བ་དང༌། ཉང་ཉི་མ་འོད་ཟེར་ཡང༌། བསྟན་པ་ཕྱི་དེར་གྱི་སྐབས་སུ་བྱུང་བ་ཡིན་མོད། ཉང་རལ་འཁྲུངས་སྐབས་ཇོ་བོ་རྗེ་འདས་ནས་ལོ་དྲུག་ཅུ་རེ་དྲུག་ལས་ཕྱིན་མེད་པ་དང༌། སྐབས་དེར་བཀའ་གདམས་ལ་གསར་རྙིང་གི་དབྱེ་བའང་མེད་པ་ཡིན། བཀའ་བརྒྱུད་པའི་བསྟན་པའི་འབྱུང་གནས་མར་པ་ལོ་ཙཱ་འདས་ནས་ལོ་ཉེར་དྲུག་ལས་ཕྱིན་མེད་ཅིང༌། རྗེ་བཙུན་མི་ལ་རས་པ་འདས་ནས་ལོ་གཉིས་པར། ཉང་རལ་འཁྲུངས་པ་ཡིན་པས་ས་སྐྱའི་གྲུབ་མཐའ་དབུ་ཚུགས་པ་ཙམ་ལས་ཆོས་སྲིད་གཉིས་ཀྱི་འཕྲིན་ལས་དར་རྒྱས་བྱུང་མེད། དེ་བཞིན་རྒྱལ་བ་གཉིས་པ་ཙོང་ཁ་པ་བློ་བཟང་གྲགས་པའི་དཔལ་ནི། ཉང་རལ་འདས་ནས་ལོ་གཉིས་བརྒྱ་དང་སུམ་ཅུ་སོ་གསུམ་པར་འཁྲུངས་པ་ཡིན་པས། བཀའ་གདམས་གསར་མའམ་དགེ་ལུགས་པའི་གྲུབ་མཐའ་ཞེས་པ་ནི་སྐབས་དེར་མིང་ཙམ་ཡང་མེད། བོད་དུ་ཆོས་ལུགས་ནི་དར་རྒྱས་ཆེ་བའི་སྒང་ཡིན། གོང་གསལ་རྒྱུ་མཚན་དེ་ཚོའི་དབང་གིས་ལོ་རྒྱུས་ཤོད་པའི་ཞོར་དུ་གྲུབ་མཐའི་ཕྱོགས་འཛིན་གྱིས་ཕན་ཚུན་བར་དགག་བཞག་དང༌། ཟུར་ཟའི་གཏམ་སོགས་ཀྱིས་ལོ་རྒྱུས་བསླད་མེད་པ་དེ་ནི་ཁྱད་ཆོས་ཆེན་པོ་ཞིག་ཡིན།
ཁྱད་ཆོས་གསུམ་པ་ནི། དར་མ་འུ་དུམ་བཙན་གྱིས་ཆོས་སྣུབ་པའི་དུས་འོ་བྲན་དཔལ་གྱི་གཞོན་ནུ་དང༌། སྣུབས་སངས་རྒྱས་ཡེ་ཤེས་དང་། དེའི་སྲས་དྲུག་གི་ཚུལ་ཇི་ལྟར་གྱུར་པ་ལྟ་བུས་མཚོན་སྐབས་དེའི་མི་སྣ་གྲགས་ཅན་ཁག་གཅིག་གི་སྐོར་དང༌། བསམ་ཡས་གཙུག་ལག་ཁང་གི་གནས་སྟངས། དེ་བཞིན་བཙན་པོའི་གདུང་རྒྱུད་ཕྱོགས་སུ་གྱེས་པ་དང༌། ཁྲི་སྐྱིད་ལྡེ་ཉི་མ་མགོན་གྱིས་མངའ་རིས་བཙད་པོའི་སྲིད་དབང་ཇི་ལྟར་བཙུགས་པའི་སྐོར་སོགས་བོད་ཀྱི་ལོ་རྒྱུས་ཡིག་ཆ་གཞན་དག་གི་ནང་མ་འཁོད་པའམ། ཞིབ་ཆ་མ་འཁོད་པའི་དོན་མང་པོ་ཞིག་ཆོས་འབྱུང་འདི་ཉིད་ཀྱི་ནང་ནས་མཐོང་ཐུབ་པ་དེ་ཡིན།
ཁྱད་ཆོས་བཞི་པ་ནི། ཆོས་འབྱུང་གི་ཚིག་སྦྱོར་རྣམས་ཆོས་ལུགས་དང༌། སྙན་ངག་མངོན་བརྗོད་སོགས་ཀྱིས་མ་བཅིངས་པར་གོ་བདེ་བ་དེ་ཡིན། གོང་དུ་བཤད་པ་ལྟར་སྤྱིར་ན་སྐབས་དེར་བོད་དུ་ཆོས་ལུགས་དར་རྒྱས་ཆེ་བའི་སྐབས་ཡིན་ནའང༌། རྒྱ་གར་གྱི་སྙན་ངག་མེ་ལོང་མ་བོད་དུ་མ་དར་གོང་གི་བོད་རང་གི་སྙན་ཚིག་གོ་བདེའི་ཚིག་སྦྱོར་གྱི་རྣམ་པ་གསལ་པོ་ཡོད་པ་དང༌། ཚིགས་བཅད་རྣམས་ཀྱང་རྐང་པ་རེའི་ནང་དུ་ཚེག་ཁྱིམ་གྱི་གྲངས་གཅིག་ཏུ་མ་ངེས་པར་ཅི་རིགས་ཤིག་ཡོད་པ་སྟེ། ཆོས་འབྱུང་འདིའི་མཇུག་བྱང་དུ་འདི་ལྟར་འཁོད་ཡོད་པ་་་་ཆོས་འབྱུང་གི་ལོ་རྒྱུས་མི་འདྲ་བ་མང་དུ་སྣང་ཡང༌། ལ་ལ་ངན་སྨྲས། ལ་ལ་ཞེ་འདོད། ལ་ལ་བསྡུས་པ། ལ་ལ་ལེ་ཚེ། ལ་ལ་བཅོས་མ་ཡིན་ཏེ། འདི་ནི་སེལ་མེད་རྣལ་མ་ཡིན། ལེགས་པ་ཟུང་ལ་ལེགས་པར་གྱིས། ལེགས་པར་སློབས་པ་མཁས་པར་མཛོད། སོ་སོའི་སྐྱེ་བོས་བཀོད་རྣམས་འཁྲུལ་པ་སྲིད། གཞུང་ལུགས་རྣལ་མ་ཐོགས་པ་ཤིན་ཏུ་དཀོན། མན་ངག་ཀུན་ལ་ཡོད་ན་མཁས་པ་སུ་ཡིས་བྱེད།་་་ཅེས་དང༌། ཡང་མཇུག་བྱང་དུ། ་་་རྒྱལ་བློན་བྱང་ཆུབ་སེམས་དཔའི་རྣམ་ཐར་འདི།