འགོ་རྩ་བསྒྲིགས་པ་འདི་རྣམས་གང་གིས་བྱས། །ལྷོ་བྲག་དཔལ་གྱི་དགོན་པར་གཅིག་པུ་རུ། །སེམས་ཅན་ཀུན་ལ་བརྩེ་བའི་ཐུགས་རྗེ་ཅན། །བདུད་རྩི་ཞིག་པོ་ཞེས་པའི་འཁྲུལ་ཞིག་དམ་པ་དང༌། །འཇིག་རྟེན་མགོན་པོ་རིན་པོ་ཆེས། །རྒྱལ་བའི་སྲས་པོ་མཐུ་བོ་ཆོས་ཡེ་ཡིས། །ཡང་ཡང་བསྐུལ་མ་བཏང་པའི་ངོར་བྱས་ནས། །བཀའ་གཏེར་མང་པོ་ཇི་སྙེད་ལེགས་གཟིགས་ནས། །ནང་བན་ཉི་མ་འོད་ཟེར་བསམ་པ་དང་བས་བྱས། །རང་བཟོ་ར་ཆོད་སྤངས་ཏེ་ཡི་གེར་བཀོད། །་་་ཅེས་སོགས་ཀྱི་ཚིག་སྦྱོར་གྱི་འགྲོས་ནི་གོ་བདེ་ཞིང་རྙིང་ཉམས་དོད་པོ་ཡོད་ཅིང༌། ཡི་གེ་མ་དག་པ་མཆིས་ཀྱང་དེ་ནི་ཞུས་དག་ནན་པོ་ཞིག་མ་བྱུང་བ་ཡིན་ལས་ཆེ། ཉང་བན་ཉི་མ་འོད་ཟེར་འདས་རྗེས་གཞི་ནས་རྒྱ་གར་གྱི་སྙན་དངགས་མེ་ལོང་མ་བོད་དུ་བྱུང་བ་ཡིན་པས། མེ་ལོང་མའི་ཤན་ཞུགས་ཀྱང་མེད་པས་བོད་ཀྱི་རྩོམ་རིག་རྙིང་པ་ལ་ཞིབ་འཇུག་བྱེད་པར་ཕན་ཐོགས་ཡོད་པ་ཞིག་རེད་འདུག
ཆོས་འབྱུང་འདི་ཉིད་རྩོམ་པའི་ཁུངས་གཏུགས་ས་ནི། བན་བོན་གཉིས་ཀྱི་ལོ་རྒྱུས་ཁག་ལ་གཏུགས་པ་ལས། ཕྱོགས་རེ་བ་ཙམ་ཡང་མིན་པ་ནི་འདིའི་མཇུག་ཏུ་བོད་ཀྱི་སྔགས་དང་མཚན་ཉིད་གྲྭ་ས་ཀུན་ལ་མཁས་པ་རྣམས་ཀྱི་སྙན་དུ་གྲགས་པའི་གསུང་དང༌། གཏམ་རྒྱུད་མ་ནོར་བ་དང༌། རྒྱལ་རབས་གསང་བ་ཆོས་ལུགས་དང༌། སྦྲགས་པ་བོན་ལུགས། རྐྱང་པ། ཁུག་པ། སྦགས་པ་གསུམ། རྒྱལ་བྣ་གབ་པ། ཡུན་པོ་གསེར་སྐས་དགུ་པ། ཟིངས་པོ་སྣ་ཚོགས་ཅན། དེ་རྣམས་ཀྱི་དོན་དང༌། སྟོན་པའི་གསུང་རབས་ལས་བྱུང་བ་དང༌། བླ་མ་དམ་པ་རྣམས་ཀྱི་བཀའ་ལུང་དང༌། རྒྱལ་པོའི་བཀའ་ཆེམས། སོ་སོ་སྐྱེ་བོའི་བདེན་པའི་ངག་སྨྲ་བ་རྣམས་ལ་འདུ་བ་དང་བསྟན་བཅོས་དྲི་མ་མེད་པ་ལས་བྱུུང་བ་དང༌། དེ་རྣམས་ཀྱི་ནང་ནས་བཏུས་ཏེ། ངེས་དོན་གཏན་ལ་ཕབ། ཚིག་གི་ལྷད་མ་བཅུག སྒྲོ་མ་བཏགས། སྐུར་བ་མ་བཏབ། གྲ་ཆག་ཟུར་ཉམས་ས་མ་བཏང༌། བཀའ་མདོ་རྒྱུད་རྣམས་དང༌། བསྟན་བཅོས་མན་ངག་ཀུན་ནས་གཏན་ལ་ལེགས་པར་ཕབ་ནས་བསྡེབས་པ་ལགས་སོ། །
ཞེས་བཀོད་པ་བཞིན་བན་བོན་ཕྱོགས་ཀྱི་ལོ་རྒྱུས་དུ་མ་ཞིག་ལ་ཁུངས་གཏུགས་ཏེ་མཛད་པ་ཤེས་ཐུབ། འདིར་བཤད་པའི་བན་བོན་གྱི་ལོ་རྒྱུས་འགའ་ཞིག་དང༌། ལྷག་པར་བོན་གྱི་ལོ་རྒྱུས་ཁག་གི་མིང་དེ་ཚོ་ནི་མཐོང་ཐོས་ཀྱི་ཡུལ་དུ་གྱུར་མ་མྱོང་བ་ཤས་ཆེ་བས་དེ་ཚོ་ད་ལྟ་རང་རེའི་ལག་ཏུ་འབྱོར་དཀའ་བར་གྱུར་ཟིན་པ་རེད། ཆོས་འབྱུང་འདིའི་པར་ཤིང་བོད་དུ་བྱུང་མྱོང་ཡོད་མེད་ཆ་མ་འཚལ་ཞིང༌། བོད་དུ་པར་རྐོའི་ལག་རྩལ་ནི། ཉང་རལ་འདས་ནས་མི་ལོ་ཉིས་བརྒྱ་ལྷག་གི་རྗེས་སུ་དར་བར་བརྟེན་ཆོས་འབྱུང་རྩོམ་སྐབས་པར་དུ་འཁོད་ཐབས་མེད་པ་ནི་བཤད་མི་དགོས་པ་ཞིག་རེད། བྲག་སྒོམ་པའི་ ༼མདོ་སྨད་ཆོས་འབྱུང་༽ དུ་བོད་ཀྱི་ལོ་རྒྱུས་ཁག་གི་མཚན་ཐོའི་གྲངས་སུ། ཉང་གི་ཆོས་འབྱུང་ཞེས་བཀོད་པར་སྣང༌། མ་དཔེ་གང་ཡིན་པ་དཔེ་སྒྲིག་བྱེད་སྟངས་ནི། ཆོས་འབྱུང་འདིའི་མ་དཔེ་ལག་བྲིས་པར་སློག་མ་ནི་ཁོ་བོ་མཁྱེན་རབ་འོད་གསལ་ ༡༩༨༢ ལོར་འབྲུག་ཡུལ་དུ་འགྲོ་སྐབས་ལག་སོན་བྱུང་བ་ཞིག་ཡིན་ཞིང༌། དེ་ཉིད་རྩ་བར་བཟུང་ཐོག་བོད་ལྗོངས་སྤྱི་ཚོགས་ཚན་རིག་ཁང་གི་བོད་ཡིག་དཔེ་རྙིང་དཔེ་སྐྲུན་ཁང་གིས་འཚོལ་བསྡུ་བྱས་པའི་མ་དཔལེ་ལག་བྲིས་པར་སློག་མ་དང་སྣུམ་པར་མ་གཉིས་ལའང་ཞིབ་བསྡུར་དང་འབྲེལ་ལེགས་སྒྲིག་བྱས་པ་དང༌། གཞུང་ཚིག་ཆད་ནོར་གྱི་རིགས་མ་དཔལེ་དེ་གཉིས་ནས་ཁ་སྐོང་ནོར་བཅོས་ཐུབ་པ་རྣམས་རྟགས་ ༼༽ འདིའི་ནང་བཀོད་ཡོད་པ་དང༌། གཞུང་ཚིག་སྔ་ཕྱི་འགལ་བའམ། ཙིག་དོན་མི་འཇུག་པ། ཡིག་ནོར་གནད་ཆེའི་རིགས་རང་སོར་བཞག་པའི་གཤམ་དུ་ནར་རྟགས་བརྒྱབས་ནས་རྟགས་ ༼༽ འདིའི་ནང་དཔྱད་གཞིའི་ཚིག་དོན་བཀོད་ཡོད་པ། མ་དཔེའི་ནང་གི་མཆན་བུ་ཡིག་ཆུང་བཏབ་པ་དག་རྟགས་ ༼༽ འདིའི་ནང་བཅུག་ནས་ཡིག་ཆུང་དཀྱུས་སུ་བཀོད་པ། གཞུང་ཚིག་དང་ཡི་གེ་ཆད་ནོར་མངོན་གསལ་གྱི་རིགས་འདི་ནས་གསབ་བཅོས་ཞུ་དགོས་བྱུང་རིགས་ལ་རྟགས་ ༼༽ འདི་བརྒྱབས་ནས་དཔྱད་གཞིར་བཀོད་ཡོད་པ། གཞུང་ཚིག་ཆད་པ་ཁ་གསབ་བྱ་ཐབས་དཀའ་བའི་རིགས་ལ་རྟགས་་་་་་་་་་་་་་་འདི་བཀོད་ཡོད་པ། ང་ཚོ་རང་གིས་གོ་བ་ལོན་དཀའ་བའི་རིགས་སམ་བློ་དོགས་གཙང་མར་མ་ཆོད་པའི་གྲས་དང༌།