[A:༡༥]ཞེས་བྱ་བ་ལས་སྔགས་ཀྱི་སྒོར་ཞུགས། དེ་ནས་རྒྱ་གར་དུ་བྱོན་ནས་སློབ་དཔོན་རཏྣ་ཨཱ་ཀ་ར་ཤཱནྟི་པ་གྲགས་པ་ཆེ་ཞིང་མཁས་པར་དགོངས་ནས་འདུལ་བ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། གསང་སྔགས་ཀྱང་མང་དུ་གསན། དེ་ནས་རྒྱ་གར་ཤར་ཕྱོགས་སུ་བྱོན་ནས་སློབ་དཔོན་བིརྺ་པའི་སློབ་མ་ནི་ཌོཾ་བི་ཧེ་རུ་ཀ །དེའི་བརྒྱུད་པ་འཛིན་པའི་སློབ་དཔོན་མི་ཐུབ་ཟླ་བ་དངོས་ཀྱི་སློབ་མ་མཆོག་དགེ་སློང་དཔའ་བོ་རྡོ་རྗེ་ལ་ཧེ་བཛྲའི་རྒྱུད་གསུམ་ཡན་ལག་དང་བཅས་པ་ལ་སོགས་པའི་སྔགས་མང་དུ་གསན། བསམ་མི་ཁྱབ་ལ་སོགས་པའི་མན་ངག་མང་དུ་ཞུས། ལམ་འབྲས་རྩ་བ་མེད་པ་ཅིག་ཀྱང་གསན། རྒྱ་གར་དུ་ལོ་བཅུ་གཉིས་བཞུགས་ནས་ལོ་ཙཱ་བ་ཆེན་པོར་གྱུར། སྟག་ལོས་ནི་ཤེས་རབ་སྙིང་པོ་རྒྱ་ཀློག་ཏུ་འདོན་པ་ཅིག་ལས་མ་ཤེས། རྡོ་རྗེ་གདན་ལ་བསྐོར་བ་བྱེད་ཀྱི་ན་བསྡད་གསུང་ངོ༌། །ཚུལ་ཁྲིམས་ཀྱི་མགོ་ཐོན་པས་སྟག་ཚོའི་སྡེ་པ་མང་པོ་བྱུང་ངོ༌། །དེ་ནས་བླ་ཆེན་བོད་དུ་བྱོན། ཆོས་མང་དུ་གསུང་གིན་བཞུགས་སྐབས་སུ་སྤ་དྲོའི་ཚུར་ཉེ་བ་རྣམ་ཐང་དཀར་པོ་ན་བཞུགས་པའི་དུས་སུ། བླ་མ་ག་ཡ་དྷ་རས་ཕྲིན་བཏང་ནས་བསུ་རུ་ཤོག་གསུངས། ཆོས་ཅི་ཤེས་དྲིས་པས་རྡོ་རྗེ་ཐེག་པ་ལ་མཁས་པར་དགོངས་ནས་དགེས་པས་བསུ་སྟེ་གྲོམ་པ་ལྷ་རྩེའི་བྲག་ལ་བཞུགས་ནས་ཆོས་ཀྱི་ཟླ་བོ་བྱས་པས་ཤིན་ཏུ་མཉེས་ནས་ལོ་ལྔ་བཞུགས་པར་བྱས། གསེར་སྲང་ལྔ་བརྒྱ་འབུལ་བར་བྱས་ནས་མུ་གུ་ལུང་དུ་བཞུགས་པར་བྱས། ལོ་གསུམ་ན་འགྲོ་གསུང༌། བླ་མའི་ཐུགས་ལ་གསེར་རྫོགས་པར་འབུལ་དགོངས་ནས་གསེར་བསྒྲུབས་པས་བག་ཙམ་མ་ལྡང་ནས་ཟུར་ཤག་འབྱུང་བ་ལ་མི་བཏང་ནས་ཆོས་སྦྱིན་གྱི་ཤོག་གསུངས་པས། ཟུར་ཡང་དག་གི་སྒྲུབ་པ་ལ་ཞུགས་པས་སློབ་མ་ལ་ལ་ན་རེ། དགེ་སྦྱོར་གི་བར་ཆད་ཡིན་ཟེར་བ་ལ། འབྲོག་མི་ལོ་ཙཱ་བ་ཆེན་པོ་ཡིན་པས་མན་ངག་ཡོད་ངེས་ཟེར་ནས་ཕྱིན་པས་གསེར་སྲང་བརྒྱ་ཙམ་ཡང་ཕུལ། བླ་མས་བསམ་མི་ཁྱབ་ཀྱི་མན་ངག་