[A:100a]bgros te 'di nas 'jig rten gyi khams 'tshengs pa'i chos 'ong ngam nor 'ong / 'on te 'jig rten gyi khams phung ba'i ngan sngags 'byung bas bton na 'thad par zhal 'cham/ slob dpon rnams kyis mthun pa'i rdzas kyis mkha' 'gro dang sde brgyad mchod/ bka' bden pa'i chos bshad/ dgongs pa rgya bskyed nas dbang du bsdus te dgung bdun gyi nub mo gter skyong rnams kyi sgrom bu rnams las/ gser gyi sgrom bu bi ma la la/ dngul hU~M ka ra/ lcags 'jam dpal bshes gnyen/ zangs klu sgrub snying po/ g.yu padma 'byung gnas/ bse dha na saMkr-i ta/ mchong rong bu gu de wa tsandar/ gzi shAnti garbha grags la/ rin po che sna brgyad ka'i sgrom bu dbus su bzhag pa kha ma phye bar slar yang gter du bzhugs pa slob dpon padma 'byung gnas kyis phyi nas bton zhes grags la/ rig 'dzin thams cad dang por rig pa'i gnas thams cad la mkhas par sbyangs la/ bar du bsgrubs/ mthar phyag rgya chen po mchog gi dngos grub brnyes pa sha stag go /de dag las bdag cag gangs can pa rnams la nyam nga ba'i dus kyi skyabs sam/ skyel ma'am/ mgon nam/ rten sa bla na med pa'i slob dpon padma 'byung gnas kyi lo rgyus ni/ lho nub rnga yab gling gi tshur rol/ u rgyan yul gyi pha rol/ chu bo chen po sindhu rgya mtshor 'bab sa/ klu'i rgyal po 'jog po'i pho brang gnas pa'i rgya mtshor padma'i sdong po phun sum tshogs pa'i ge sar gyi rtser/ khye'u lo brgyad tsam lon pa'i na tshod gzugs byad phun sum tshogs pa zhig tu brdzus te 'khrungs pa/ rgyal po indra bhU ti chen pos mkhyen nas rgya mtshor 'gro ba'i gzings bcas te/ de'i thad du phyin nas sprul pa'i khye'u de spyan drangs/ rang gi sras su gzung de la rgyal srid gtad de/ rang sgrub pa la zhugs/ des gdul bya rnams smin par mdzad/ de nas rgyal srid spangs te yul dbus su byon/ kun dga' bo las rab tu byung / theg dman gyi gzhung la thos pa mdzad/ gsangs te gsang sngags gsan/ dur khrod bsil ba'i tshal du gsang spyod la byon/ ta na ga na te sbyor ba dang sgrol