[A:10a]dpa' la 'jigs pa'i bag tsam yang med la/ byams pa'i thugs mnga' bas phas kyis 'phangs pa'i mtshon cha rnams kyang me tog gi char du gyur to/ /yang sdig can gyis/ sngon chad kho bos mchod sbyin gtan pa med/ /byas pa la ni khyod nyid dpang yin na/ /khyod la 'di la dpang 'ga' yod min pas/ /smras kyang dpang med de ni pham pa yin/ /zhes rgyu lam bsgrub pa la skur pa btab pas/ rgyal po'i sras kyis phyag g.yas sa la brdabs te/ sa 'di 'gro ba kun gyi dpang yin te/ /rgyu dang mi rgyu nye ring med par snyoms/ /'di ni bdag gi dpang ste rdzun med pas/ /sa khyod 'di la bdag gi dpang byos shig /ces gsungs pas/ sa rab tu g.yos shing sa'i lha mo lus phyed phyung nas/ skyes bu chen po de bzhin te/ don 'di la bdag mngon sum du gyur pa lags mod kyi/ bcom ldan 'das nyid 'jig rten thams cad kyi dpang lags so zhes gsol lo/ /sdig can dpung dang bcas pas sgra de thos pa dang / nags su sengge'i sgra sgrog wa tshogs dang / /bya rog rdo 'phangs mod la byer ba bzhin/ /dngangs skrag snying 'gas tsam du thams cad bros/ /zhes pas/ de nas bros te 'dod pa'i dbang phyug mya ngan gyi khang bur zhugs so/ /de'i tshe gtsang ma'i lhas sdig can la rnam pa bcu drug gis smad cing / shing gi lhas byang chub sems dpa' la rnam pa bcu drug gis bstod do/ /de ltar bdud kyi dpung chen po'i g.yul ngo las rgyal bas rgyal ba zhes pa'i mtshan thob cing / nam gung la byang chub sems dpas bsam gtan bzhi bskyed/ bzhi pa'i rab mthar rten 'brel lugs 'byung lugs ldog la brtags te/ rig pa gsum bskyed nas nam gyi cha smad rnga brdung ba tsam gyi tshod la skad cig ma gcig dang ldan pa'i shes rab kyis mngon par rdzogs par sangs rgyas so/ /de nas shing ta la bdun srid tsam du 'phags te lam gyi rgyud ni chad do zhes pa la sogs pas ched du brjod do/ /de la phyogs bcu'i sangs rgyas rnams kyis skyes phul/ bdag cag ji ltar byang chub thob pa ltar khyod sangs rgyas te/ dper na mar dang mar gyi nying khu mtshungs pa bzhin no zhes bsngags/ sde brgyad kyi tshogs chen pos mchod do/ /sangs rgyas zhes bya ba ni sku gsum mdzad pa dang bcas pa'i rang bzhin te/ sangs rgyas ma thag nas sems can ji snyed pa'i sku/ de snyed pa'i gsung / de mkhyen pa'i thugs te sku gsung thugs mi zad pa rgyan gyi 'khor lo zhes sam/ gsang