[A:126a]kha che ste/ sngon dgra bcom pa nyi ma gung pas phyogs de klu las blangs/ der sgyu ma mkhan sgyu ma skyed bcug pa phun sum tshogs te mi 'jig par byin gyis brlabs pas/ grong khyer dpe med ces bya bar bram ze'i rigs la dkar nag brgyad yod pa'i bzang shos bram ze rgyal po byed pa'i ming nA ro ta pa zhes bya ba'i brgyud/ yab kha che'i rgyal po dge ba'i go cha/ yum dpal gyi blo gros kyi sras su 'khrungs/ mtshan kun tu bzang po/ lcam dpal gyi ye shes zhes bya ste lcam sring gnyis so/ /de cher skyes nas bram ze las drug la sogs pa phyi rol pa'i rig pa'i gnas thams cad khong du chud/ sangs rgyas kyi bstan pa la dad nas yab yum la gnang ba zhus te/ yul de nyid kyi dgra bcom pa lnga brgya'i bzhugs gnas bdud rtsi 'byung ba'i gtsug lag khang zhes bya bar bye brag smra ba'i 'dul ba 'dzin pa dzi na mi tra las rab tu byung ste chos kyi rgyal mtshan zhes bya/ sde snod gsum par gyur nas yul dbus nA lendrar byon/ gnas brtan klu'i sde zhes bya ba mkhan po byed pas/ de las sems tsam dang / A ka ra shAnti pa zhes bya ba ArYa de wa dang / zla ba grags pa'i slob ma de dang / ku ku ri pa'i slob ma chos kyi pa'am 'gro bzang snying po/ rig sngags 'chang rgyal ba'i sde sogs las theg pa chen po gnyis kyi gzhung lugs rgya mtsho lta bu'i thos pa mdzad/ mi brjed pa'i gzungs thob pas blo gros kyi nor btsun pa dbyig gnyen la sdo bas thams cad du gnas brtan bstan pa 'dzin pa zhes grags so/ /der mu stegs byed kyi rgol ba glang po chen po lta bu'i khengs pa dag rtsod pa'i grwar 'dul ba la smra ba'i sengge/ rang dang gzhan gyi sde pa thams cad kyis rtsod med ces sam/ dpal 'jigs med grags pa zhes bsngags te lung dang rig pa smra ba thams cad kyi gtsug gi nor bur bkur ro/ /der nA lendra'i mkhan po mdzad de bstan pa yun ring du bskyangs pas rgyal sras nA lendra pa zhes grags shing / slob dpon tsi lu pas der byon te dpal dus kyi 'khor lo legs par bshad pa na/ 'khor paNDYi ta lnga brgya dang bcas pas zhabs la btud pas/ de la dus zhabs pa chen po zhes dang / 'di nyid la dus 'khor zhabs chung ba zhes grags la/ dpal dus kyi 'khor lo dbang