[A:142a]gser gling pa rab tu byung ba lnga brgya dang bdun cu rtsa gnyis kyis bskor nas bsus/ jo bo dpon slob brgya nyer bdun yod ces grag gser gling pa'i gzims khang gser gdugs can du byon te/ lo bcu gnyis su dbu sngas sbrel nas mngon par rtogs pa'i rgyan/ spyod 'jug la sogs pa gsan te theg pa chen po'i chos kyi rtsa ba byams snying rje byang chub kyi sems la sbyangs/ de nas phyir log yul dbus su phebs/ thugs dam gyi lha mang po'i zhal gzigs/ jo bo bstan pa'i bdag por 'os nas paN chen lnga bcu rtsa gcig gis lha khang brgya rtsa brgyad kyi lde mig gtad/ de'ang jo bo la bla ma mang po yod pa'i nang nas/ lta ba lung ston pa'i bla ma nA ro pa/ rgyud byin gyis brlabs pa'i bla ma Dombi pa/ las tshogs man ngag ston pa'i bla ma ba liM A tsArYa/ rdzu 'phrul dngos su ston pa'i bla ma paNDYi ta mi tra chen po/ phag mo'i byin rlabs mdzad pa bhU ta ko Ti pa/ klu sgrub kyi gdams pa ster ba'i bla ma mkhas pa rda mchog byang sems brtan par byed pa shes rab bzang po/ tshig don rgyas par byed pa A ka ra shAnti pa/ blo sbyong gi rim pa ster bar byed pa gser gling pa/ lta spyod nyams len gsum du dril na/ dang po rig pa'i khu byug gnyis pa gser gling pa dpal chos kyi grags pa/ gsum pa Dombi pa ste/ de gsum la gtso bor 'dzin/ gser gling pa chos kyi grags pas slar spyan drangs/ de res lam la zla ba drug gis chog par byung / bla ma nyid kyi lta ba dbu mar bsgyur/ tshur byon bi kra ma la shI la'i dge bskos mdzad/ de'i tshe rgyal sras mai tri pas phag mo mchod pa'i chang bsnams pa gzigs/ gnas nas dbyung ba brtsams pas/ de dge 'dun gyi dbus nas rtsig pa la thogs pa med par song ba dang 'gyod nas bzod par gsol/ bzhes kyang / de'i nub mo jo mo sgrol ma byon nas/ bu de bton pa ni ma legs so/ /byang chub sems dpa' la sdig pa bsags pas rnam smin shin tu che'o gsungs/ rnam smin ji lta bu zhig 'byung zhus pas/ ri rab la lan gsum 'khor ba'i sems can chen po zhig tu skyes nas bya sna tshogs kyis za bar byed gsungs/ 'o na de la ci phan zhus pas/ byang phyogs su phyin nas theg pa chen po'i chos dar bar byas na phan/ nyin re re la tsha tsha bdun