[A:147a]ces dbang bskur bas/ sa chog la sogs pa'i go rim gang yang mi snang bas dbang thob pa'i go mi chod dam snyam pa'i tshe/ sa ka ras/ ri bo mchog la bzhugs pa'i rgyal ba ri khrod pa/ /gzhu dang ri dwags phag pa ma yin sprul pa ste/ /zla ba gang bzhin 'jig rten na ni mchog tu mdzes/ /sprul pa'i gzugs kyis skye bo thams cad 'dul bar byed/ /dge dang sdig pa gang la yang / /mi mthun gnyen por khyod ma bsten/ /rang rig ye shes seng nge bzhin/ /byas pas kyang yid ma ches pa la/ chos bshad pa'i gling du nam mkha' lta bu'i rgyud rnyog pa med pa/ rgya mtsho lta bu'i rgyud gsang ba 'dus pa/ ye shes lta bu'i rgyud dgyes pa rdo rje/ byin rlabs lta bu'i rgyud 'khor lo sdom pa/ lde mig lta bu'i rgyud mtshan brjod/ don mthar thug ston pa grub snying gi chos skor thams cad zhag bcu gnyis la stsal bas yid ches nas log 'byon khar/ khyod nga la the tshom zos pas tshe 'di la mchog gi dngos grub mi thob/ 'chi khar rdo rje rnal 'byor mas bsus te bar dor mchog gi dngos grub thob par 'gyur ro/ /zhes lung bstan te mi snang bar gyur to/ /de nas lam du thang chad de nyal/ gnyid sad nas ri khrod pa la zhus pa'i chos rnams la bsam mno btang bas thams cad brjed 'dug da log na mi la ngo tsha lceb bam bsam pa dang / ri khrod pa mdun du byon nas mai tri pa khyod ci nyes gsung / ngas chos thams cad brjed 'dug pas lceb bam bsam gsol pas/ gnyis med rdo rje a wa dhU tI pa/ /ma skyes pa yi chos rnams la/ /brjed ces bya ba ga la srid/ /ma 'gags pa yi chos rnams la/ /brjed ces bya ba ga la srid/ /khams gsum ye nas grol ba la/ /ma rig pa yis bsgribs pa yin/ /'khor lo bde mchog bde ba'i mchog /ma skyes pa yi rang bzhin nyid/ /ces gsungs pa dang / mai tri pa la rtogs pa shar sa dang po'i ye shes sgrib med du gzigs so/ /ri gsum slob dpon phyag rgya de dag gis mdzad pa thams cad snying po'i don ston pa'i brdar go ste/ bla ma la rtogs pa phul ba/ chos rnams thams cad stong pa nyid/ /stong pa nyid dang snying rje gnyis/ /gnyis su med pa slob dpon yin/ /rnal ma'i don la rnam dpyad na/ /gang ltar byas kyang grol bar 'gyur/ /dmigs pa med pa/ bcos ma ma yin pa/ dran pa rdul tsam yang med pa'i don zhig ngas rtogs/ da ni su