[A:159a]kyi sku rten byin rlabs can mang po spyan drangs/ sku rgyu spungs pa la rang byon bcu gcig zhal byon/ de'i tshe bod la yi ge med pas thon mi a nu'i bu 'jam dbyangs kyi sprul pa sambho Ta kha cher yi ge slob tu btang / des slob dpon lha rig pa'i sengga zhes bya ba las sgra legs par bslabs/ bod du log nas bod kyi skad dang bstun nas gsal byed sum cu/ dbyangs gug kyed bzhir bsdus/ dbyibs kha che'i yi ge dang bstun nas lha sa'i sku mkhar ma rur bcos/ sgra'i bstan bcos brgyad mdzad/ rgyal pos kyang yi ge dang sgra legs par slob pa'i tshul bstan/ rgyal pos mi dge ba bcu bgags shing / dge ba bcu spyod pa'i khrims bcas pa dam pas rgyal po'i mtshan srong btsan sgam por grags zer/ btsun mo gnyis kyis gtsug lag khang 'gran nas rtsig par chas pa la/ khri btsun gyi gtsug lag khang thog mar byed pa'i sa 'o thang gi mtsho la lung bstan pas rtsig ma thub/ rgyal po la zhus pas/ bod spyi srin mo gan kyal du sgyel ba 'dra ba'i 'di snying ka yin/ der lha khang 'debs pa la sa'i dpyad gzhan rnams mnan dgos gsungs nas/ dpung pa g.yas la ska tshal g.yon la khra 'brug rkang pa g.yas la gtsang 'gram/ g.yon la grom pa rgyang / ru bzhi'i gtsug lag khang zer/ gru mo g.yas la kong po bu chu/ g.yon la lho brag mkho mthing / pus mo g.yas la ska brag g.yon la pra dum rtse re/ mtha' 'dul gyi gtsug lag khang zer/ lag mthil g.yas la byang tshal gyi rlung gnon/ g.yon la khams kyi glong thang sgron ma/ rkang mthil g.yas la mang yul byams sprin/ g.yon la mon bum thang / gzhan yang sa non gyi lha khang / mchod rten brgya rtsa brgyad sprul pa bkye nas bzhengs/ gdod 'o thang gi mtsho la rdo'i khar brtsigs shing gis phub/ klu'i 'dag pas zhal zhal byas/ ras sa bskyal de brdal ba la lha khang brtsigs te/ bzo khyad las 'phrul lta bur snang bas ra sa 'phrul snang zhes grags/ kong jos ra mo che bzhengs/ rgya gar gyi slob dpon ku sa ra/ bram ze shang ka ra/ bal po shrI la manydzyu/ rgya nag gi slob dpon mahA de wa tsho spyan drangs/ lo tsA ba thon mi/ de'i slob bu dharmA ko sha sogs kyis byas/ gsung rab kyi skad bcos/ mdo sde za ma tog bkod pa sogs bsgyur/ rgyal pos gdam ngag gnang nas yer par sgom grwa btsugs te rab byung med/ rgyal pos lo drug cu rtsa dgu rgyal srid