[A:200a]ro 'di zhag bdun ma bsgul bar zhog de nas nga'i rig pa phung po 'di la zhugs nas lam gyi lhag ma bgrod nas phyag rgya chen po mchog gi dngos grub thob par byed do gsung / sras ma smad kyis ma nyan par tshos btang gi me la phul/ de tsa na drod ma yal bar yod zer ro/ /'khon dkon mchog rgyal po ni/ rgyal po khri srong lde btsan gyi nang mir gtogs pa 'khon dpal po che'i rgyud du 'khrungs/ bla chen 'brog mi la dgyes rdor rgyud gsum gyi bshad pa legs par gsan/ gzhan yang paNDYi ta shes rab gsang ba/ ba ri ba/ mal gyo/ spu rangs lo chung sogs bla ma mang po bsten/ 'dis sa skya btab/ sku tshe ring sgrub pa dang 'chad nyan spel te bstan pa la bya ba che'o/ /se khar chung bas lo bcu bdun du bsten yang lam 'bras bu'i skabs ma tshang / phyis sras indra bsten nas rdo rje'i tshig zhabs ma tshang ba rnyed/ bla chen nyid lo gcig bskyar nas bsten pas gdam ngag tshang zhing / de'i rjes su lam bsdus te sgrub pa lung byin mdzad pas bum pa gang 'byo'i tshul du byung / bshad pa 'khon dkon mchog rgyal po la zhus/ de la man ngag phar phul/ yon tan ni bskyed rim la brtan pa cung zad thob/ rtsa sngags kyi sgo nas nus pa brnyes/ khang chung gi klu sin mo thu ba zhig btul nas gzhan du sbas/ 'og rlung la dbang thob/ byang sems zin pas jo mo yod kyang sras la sogs pa med/ sku'i bkod pa'ang du mar ston nus/ mdor na gnas sbyong bzhi cu rtsa gnyis kyi nyams thams cad skyes shing 'byongs pas phyir mi zlog pa yin gsungs/ des man ngag rab tu byin pa zhang sku mched/ 'bring du sbyin pa zha ma lcam sring / 'di las ko brag pa'i lam 'bras byung / mtha' mar sbyin pa se sgom byas yas las/ dang po zhang ston chos 'bar dang / gcung gzi byin 'bar/ gsung rab kyi rtsi dras mkhan/ ses mdo mang bzhengs pa'i rtsi dras la yong / 'brel thogs/ 'bul ba dang spyod lam gyis mnyes par byas/ gzhung rdzogs par gnang / zhang chos 'bar la yon tan/ khams 'dus pa bar ma'i thad sor slebs/ ting nge 'dzin dpag tu med pa mnga'/ mngon shes brtan po yod/ gnyen lcug bzhi la mnga' brnyes pas lus stag dang bya sogs gzhan du sprul nus/ lus kyi bkod pa bdun tsam du ston no/ /