[A:202a]byas na gdul bya dpag tu med pa'i don du 'gyur/ khyad par sku lus ma spangs par phyag rgya chen po mchog gi dngos grub thob pa'i slob ma gsum/ bzod pa thob pa'i rnal 'byor pa bdun/ rtogs pa dang ldan pa'i rnal 'byor pa brgyad cu tsam 'byung zhes lung bstan/ lo bco brgyad pa la bla ma a seng gis khungs chod nas nyid la gsung ngag rin po che mnga' bar gda' bas/ sngar nga la yod kyang mi gsung bar 'dug da lam tshar gcig gsungs pa dang yi ge zhib pa zhig kyang mdzad par zhu gsungs/ bka' rgya thems pas tshar gcig gsungs/ lam 'bras bsdus don ma de mdzad/ de nas lo bzhi ma gsungs/ ru mtshams pa dga' thed bya ba bla ma yun ring du bsten pa zhig gis zin bris la gnad 'chugs pa gzigs nas/ nyams dogs khong gi don du dga' thed ma mdzad/ de nas klog skya ma sogs snga phyir 'grel pa bcu gcig tsam mdzad/ thams cad kyi rjes ma gnyags ma tshig nyung don rgyas tshig sdeb legs/ 'chad sla bar dgongs nas ding sang gi bar du phyag len mdzad do/ /gzhan yang bi rU pa byon nas rgyud sde bdun cu rtsa gnyis dang / sgrub thabs lam 'bras bshad/ bla ma'i rnal 'byor gegs sel gyi gnad/ grub chen bcu/ rnam 'joms lus dkyil/ bi rU pa nyid kyi sgrub skor sogs chos mang du gsungs/ byin gyis brlabs/ sku che ba'i yon tan sdom pa gsum dang 'gal ba'i nyes pa phra mos kyang ma gos/ byams pa dang thugs rjes rgyud brlan/ dngos po gang la'ang mi chags/ dad pa dang sgrub pa'i sgo nas bla ma mnyes par mdzad/ nang du rten 'brel 'grig pas yi dam lha'i zhal gzigs/ chos thams cad la mnga' brnyes/ mngon shes dang rdzu 'phrul thogs pa mi mnga' ba yin la/ zhang ston gyis lung bstan pa bzhin gyi slob ma'ang byon/ de la sras bzhi/ che 'og slob dpon rin po che bsod nams rtse mo yab dang / gsang phur phya pa las mkhas pa chen por gyur gyi bar sbyangs/ bstan bcos du ma brtsams/ phal cher dben par gzhol/ tshul khrims kyi phung po bu gcig pu lta bur bsrungs te/ dgung lo zhe gcig la sku ma spangs par bde ba can du byon no/ /gsum pa rje btsun chen po grags pa rgyal mtshan/ dgung lo bcu bzhi pa la