[A:210a]lo de las mched pa rnams la jo lugs su grags so/ /dus 'khor lugs gzhan ni/ dus zhabs pa'i slob ma shrI bha dra bo dhis/ gyi jo zla ba'i 'od zer/ des dus 'khor gyi bshad pa yun ring po mdzad kyang / slob ma dus 'khor shes pa bzhi las ma byung / de dag gis bshad ka ma zin/ dA na shrI'i slob ma rma dge blo/ mda' 'od blo snying / byang she sogs kyis bshad ka ma tshugs/ a bhya'i slob ma khe gad 'khor lo grags/ rga lo/ ro lings lo tsA/ steng pa lo tsA sogs kyis bshad ka ma tshugs/ se los rtsa mi lo tsA ba sangs rgyas grags la zhus nas gnyos 'od la gnang / de nas rim gyis brgyud de rtsa mi lugs kyi bshad ka byung / de ltar dus kyi 'khor lor 'gyur mi gcig pa nyi shu rtsa lnga tsam yod la bod du dar bar gyur to/ /rtsa mi lo tsA ba 'di 'khrungs yul mi nyag gi phu rtsa mi shing mi ba yin pas mtshan de ltar thogs/ rdo rje gdan pa chen po'i slob ma/ gdan pa chung ba dang phar zhu tshur zhu/ bod mi rgya gar du phyin pa la 'phrin las che/ rga lo gzhon nu dpal yang rgya gar du grub thob kyi grags pa thon/ bod du chos skyong phyag bzhi'i skor la khong dang steng lo/ khe gad rnams sku drin che/ bo dong rin rtse'i slob ma stag sde pa sengge rgyal mtshan/ de la mkhas pa shong sku mched dang dpang los gtugs pa shong ston ni/ sbyin lung shar kha'i bong ra zhes par 'khrungs mtshan rdo rje rgyal mtshan/ stag sde par phar tshad mngon pa/ dus 'khor 'gro lugs gsan/ u rgyan pa'i gcen po go lung pa mdo sde dpal rgyal mtshan la'ang dus 'khor sogs sngags mang du gsan zhing / bla ma 'phags pa bod du byon pa na/ bstod pa tshigs su bcad pa tshig rgyan gyis mdzes pa phul/ lo tsA slob tu 'gro bar zhus pas/ de lta bu'i blo skye ba bzang / gzhung lugs gsar pa bsgyur nus pa 'ong bar dka' ste/ paNDYi ta la slob gnyer dri gtugs legs par gyis/ kho bo kyang chos rje bsten yun thung pas sdeb sbyor me tog gi chun po dang / tshig gter la sogs pa tshul bzhin du mi shes par snang bas/ 'di dag shes pa zhig ci nas kyang gyis shig de dag gi dpe dang gser srang lnga/ dar yug bcu rnams gnang / bal yul du byon nas paNDYi ta lakShIM la sogs pa bsten te/ rig pa'i gnas chung ba lnga la sbyangs/ khyad par sgra rig phul du phyin/ sa skyar byon dus 'khor 'grel pa dang bcas pa'i 'gyur mdzad/