[A:2a]sum dam par bdud rtsi'i gter/ /bstan pa mu thi la yi mchod sdong mthu chen de la 'di mchod sprin/ /gtan tshigs bzang pos bongs 'os kyang / /dal bar byol bas mdor bsdus 'di/ /rgan pos rab bkram gtam gzhi'i rdzas/ /zong du btang yang phrag dog min/ /des na chos kyi rgyal po'i mdun/ /mol mchid phun tshogs 'byung ba la/ /yid gzhungs bsam mno'i pha mtha' ba'i/ /dpyad gsum dag pa 'di 'os so/ /'dir bshad par bya ba ni ston pa 'jig rten du byon tshul/ des bstan pa rin po che'i sgrom bcas tshul/ de gces spras su mdzad pa'i mkhan po ji ltar byon pa che long tsam brjod pa gsum las/ dang po ni zhing grub pa'ang sangs rgyas kyi smon lam dang sems can gyi las rang du zad pa las/ 'di ni sangs rgyas kyi smon lam gyi stobs te/ sngon bskal pa chen po 'dzin pa zhes bya ba nam mkha'i phyogs 'di nyid du gling bzhi la dbang byed pa'i rgyal po rtsibs kyi mu khyud ces bya ba bu stong / rgyal phran brgyad khri bzhi stong / mdun na 'don bram ze rgya mtsho'i rdul zhes bya ba yod pa zhig byung / mdun na 'don de la sras brgyad cu/ slob ma bram ze stong zhig yod pa'i sras che ba bram ze rgya mtsho'i snying po mngon par rdzogs par sangs rgyas te de bzhin gshegs pa rin chen snying po zhes grags par gyur to/ /de bzhin gshegs pa des rdzu 'phrul gyi cho 'phrul gyis sangs rgyas kyi zhing rgya mtsho sprul pa la rgyal po 'khor dang bcas pa rang rang 'tshang rgya ba'i zhing lo bdun du gdam bcug pa las/ yab bram ze dang slob ma dgu brgya go dgus gdams pa 'di yin la/ de'i nang nas yab bram zes de dag gis spangs pa'i snyigs ma lnga bdo ba 'di bdams pas/ rgyal ba thams cad las nyam nga ba rnams la brtse ba 'di lhag par gyur to/ /