[A:32a]! gsum pa theg chen ji ltar dar ba'i tshul bshad pa la/ rgyu'i theg chen dar ba'i tshul dang / 'bras bu'i theg chen dar ba'i tshul lo/ /dang po ni/ theg pa chen po'i srol 'byed pa'i shing rta chen po gnyis su grags pa las dang po ni/ langkar gshegs pa'i mdo las/ lho phyogs be ta'i yul du ni/ /dge slong dpal ldan cher grags pa/ /de ming klu zhes 'bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg pa rab bshad nas/ /rab tu dga' ba'i sa bsgrubs te/ /bde ba can du de 'gro'o/ /zhes so/ /'jam dpal rtsa rgyud las/ de bzhin gshegs pa nga 'das nas/ /lo ni bzhi brgya lon pa na/ /dge slong klu zhes de 'bod 'byung / /bstan pa la ni dad cing phan/ /rab tu dga' ba'i sa thob pa/ /lo ni drug brgya dag tu 'tsho/ /rig pa rma bya chen mo ni/ /bdag nyid chen po des kyang 'grub/ /bstan bcos sna tshogs don dang ni/ /dngos po med pa'i don de rig /gang tshe lus de bor ba na/ /bde ba can du skye bar 'gyur/ /de ni mthar gyis sangs rgyas nyid/ /nges pa kho nar yang dag thob/ /ces zab mo lta ba'am mtha' bral dbu ma'i srol 'byed du lung bstan pa ni klu sgrub ste/ ston pa mya ngan las 'das nas lo bzhi brgya na lho phyogs be darbha'i yul gyi bram ze'i rigs che zhing mtho ba rgyal po la bsdo ba'i 'byor ba dang ldan pa zhig la bu med nas/ lhas bram ze brgya la chos ston drangs na yong bar rmi lam du lung bstan pa bzhin chos ston byin pas/ zla ba bcu na khye'u phun sum tshogs pa zhig btsas te/ nam mkha' nas klu sgrub ces bsgrags pas mtshan de ltar btags/ mtshan mkhan la bstan pas mtshan bzang mod kyi zhag bdun gyi tshe las med do zhes zer bas thabs med dam dris pas/ bram ze brgya la ston mo drangs na zla ba bdun/ dge slong brgya la drangs na lo bdun thub/ de nas thabs med zer ba de bzhin byas te lo bdun du nye ba na bu'i ro pha mas mthong mi bzod de/ 'khor dang bcas pa ljongs rgyur btang ba mthar gyis na landra'i mkhan po sgra gcan 'dzin bzang po'i sgor son te der rig byed bsgrags pa na nang du bos te dris pas rgyu mtshan gsol to/ /rab tu 'byung nus sam/ nus zhus te rab tu byung / rma bya chen mo yi dam du phog cing bdun pa'i tshe gzungs mtshan ril bton pas grub ste/ lo drug brgya 'tsho bar gyur te thun mong gi dngos grub brnyes/ mkhan po 'di nyid kyi drung du bsnyen par rdzogs/ 'phags pa 'jam pa'i