[A:3a]de'i phyir bskal pa 'di la de dag 'tshang rgya bas sangs rgyas stong 'byung ba yin no/ /yang bskal pa mdzes par snang ba la sangs rgyas yon tan mtha' yas rin chen sna tshogs bkod pa'i rgyal po zhes bya ba byung zhing / 'khor los sgyur ba'i rgyal po yul 'khor srung / btsun mo bdun 'bum/ sras stong tshang ba/ btsun mo ma smad ma dang dpe med ma'i phang du khye'u chos sems dang / chos kyi blo gros zhes bya ba gnyis brdzus te 'khrungs la/ rgyal po des lo bye ba tshang bar sangs rgyas 'khor dang bcas pa yo byad thams cad kyis bsnyen bkur nas/ yab kyis gzhon nu 'di thams cad byang chub tu zhugs pa sha stag yin na 'di dag las thog mar gang 'tshang rgya brtag par bya'o snyam/ de thams cad kyi ming bris nas rin po che sna tshogs kyi bum par bcug mchod pa byas te thams cad kyi mdun du ming rim gyis phyung ba na/ thog mar gzhon nu rnam par dag pa'i blo gros kyi ming byung bas sa g.yos sgra bsgrags te 'khor ba 'jig tu lung bstan to/ /gnyis pa rnam par rgyal ba gser thub/ dbang po zhi ba 'od srung / don thams cad grub pa bdag cag gi ston pa/ ska rags can byams pa zhes pa nas/ blo mtha' yas grags mos par gyur pa'i bar du shes par bya'o/ /khye'u chos sems ni de thams cad kyi gsang ba'i bdag po lag na rdo rje/ chos kyi blo gros ni de thams cad kyi chos kyi 'khor lo bskor bar bskul ba po tshangs pa chen po gtsug phud can/ yab de ni mar me mdzad ces 'byung ngo / /bskal pa 'di mtshor chags pa'i dus mtsho de la gser gyi padmo stong byung bas lha rnams kyis 'di la sangs rgyas stong 'byung bar shes nas bskal pa bzang po zhes btags shing mi mjed 'jig rten gyi khams zhes kyang bya'o/ /de'i gnas bskal gyi dang po ya thog ring mo 'di kha'i tshe lo bzhi khrir babs pa na 'khor ba 'jig sum khri la gser thub/ nyi khri pa la 'od srung / brgya pa la shAkya thub pa/ byams pa bar gyi khug pa dang po'i mar 'grib kyi brgyad khri la 'byung bas de bzhin gzhan dag kyang ngo / /mdzod las/ mar ni 'grib pa yi/ /brgya yi bar la de dag 'byung / /zhes so/ /tshe lo brgya pa la byon pa'i ston pas dang por thugs bskyed/ bar du grangs med gsum gyi tshogs bsags/