[A:41a]'jam dpal rnon po bsgrubs pas zhal gzigs/ yab 'das te sang rgyal por dbang bskur ba'i do nub rmi lam na/ rang nyid sdod rgyu'i khri la rje btsun 'jam dbyangs bzhugs nas/ bu gcig 'di ni nga yi stan yin te/ /nga ni khyod kyi dge ba'i bshes gnyen yin/ /nga dang khyod gnyis stan cig la 'dug pa/ /'di ni rnam pa kun tu rigs ma yin/ /zhes gsungs pa rmis pas/ rgyal srid gzung mi btub par shes te bros nas nA lendrar paNDYi ta lnga brgya'i khyu mchog rgyal ba'i lha las rab tu byung ste/ mtshan zhi ba lha zhes btags so/ /der nang gi kun spyod 'phags pa la chos gsan cing de la mnyam par 'jog pa dang / bstan bcos zab mo rtsom pa mdzad kyang / phyi'i spyod lam za nyal bshang ba ma gtogs gzhan gyis ma rig pas/ bhu su ku 'du shes gsum pa zhes grags shing gzhan rnams kyis phyi'i spyod pa la dpag nas rab tu byung ba'i bya ba 'khor lo gsum yin pa la/ 'di gang dang yang mi ldan pas dad pas byin pa longs spyod par mi rung bas bskrad par bya/ de'ang mdo 'don res byas pas rang 'bud la 'gro snyam bgros nas mdo 'don par bskul lo/ /khas blangs pa dang the tshom du gyur la/ sang skye bo'i dbus su khri mthon po bshams pa la/ phyag gis mnan nas steng du byon/ der sngar ma grags pa 'don nam grags pa 'don gsungs pas/ ma grags pa 'don par zhus pas/ byang chub sems dpa'i spyod pa la 'jug pa gsungs te/ gang tshe dngos dang dngos med dag /ces pa'i mtshams nas nam mkha' la je mtho je mthor song nas mthar sku mi snang bar gsung grags pa'i sgo nas rdzogs par bton te gshegs so/ /de gzungs thob pa rnams kyis ji ltar zin pa bsdus pas shlo ka bdun brgya dang / stong dang stong lhag tsam ste gsum byung bas the tshom zhing / bslab pa kun las btus pa yang / /yang dang yang du blta bar bya/ /zhes dang / yang na re zhig mdor bsdus pa/ /mdo rnams kun las btus pa blta/ /zhes pa'ang ma shes pas lho phyogs mchod rten dpal yon can na bzhugs par thos nas/ dge slong gnyis spyan 'dren du btang ba mjal/ de dag zhus pas/ bslab btus dang mdo kun las btus kho bo'i grwa khang gi gdung gseb na paNDYi ta'i yi ge phra mo bris pa zhig yod/ spyod 'jug shlo ka stong tshang ba de yin zhes lung bstan/ de dag gi bshad pa dang sgrub pa'i lung yang gnang ngo / /de nas shar phyogs su byon te 'khrug