[A:44a]zhi ba 'tsho/ ka ma la shI la/ blo gros chen po/ mi pham bshes gnyen/ dza ya A nanta/ pa tshab nyi ma grags/ thal 'gyur pa/ klu sgrub nas ArYa de wa/ zla ba grags pa/ btsun pa de wa tsandra/ rgyal rigs 'jam dpal grags pa/ kha che rin chen rdo rje/ bram ze sardza na/ jo bo ha su ma ti/ pa tshab nyi ma grags so zhes byung zhing / ArYa de wa mya ngan las 'da' kha'i slob ma yin/ des bstan pa yun ring du bskyangs pas zla grags kyis de la dngos su thug par rigs la/ gzhan dpa' bo dang phyogs glang gis de bzhin gshegs pa la spel mar bstod pa mdzad pas thog mnyam pa dngos su grub/ 'jug pa rang 'grel las/ dbyig gnyen dang phyogs glang dang dpal ldan chos skyong la sogs pa sngar byon pa zhes gsungs pas/ de dag zla grags las snga bar shes/ 'ga' zhig tu klu sgrub 'das nas lo bzhi brgya na zla grags 'khrungs/ bzhi brgyar bzhugs zhes pa la phyed lhag pa dang / bka' gdams pa kun klu sgrub rang gi slob ma zla grags/ des lo bzhi brgya/ de'i slob ma rig pa'i khu byug des lo sum brgya/ de'i slob ma jo bo yin par bzhed de/ phyi ma 'di la lo grangs nyis brgyas nyung ba'i skyon snang / des na zla grags kyi slob dpon ArYa de wa yin la/ des dag snang gis klu sgrub mjal bas gsang 'dus 'phags lugs pa rnams ltar de'i dngos slob kyang yin no/ /de bzhin legs ldan 'byed kyang bsnyen par rdzogs sa klu sgrub rang yin la bshad rgyun snga ma kho na'o/ /sangs rgyas bskyangs kyi 'grel pa la 'ga' zhig tu shes rab sgron mer mi 'thad par smos pa dang / de slar zla ba grags pas 'thad par bsgrubs shing / rang rgyud kyi sbyor ba bkod pa mi 'thad pa tsam brjod pa la thal rang rtsod ces par zad la/ thal rang de nas gyes pa yin/ gzhan slob dpon de dag thog snga phyi chen po yod pa gcig nas gcig tu brgyud las 'ongs dang zhes gsungs dgos byung bas shes so/ /gzhan yang rang rgyud pa dang thal 'gyur pa mi mthun pa chen po skad zer ba'ang rang gis rang rgyud 'jog lugs kyi blo'i skyon yin/ lugs gnyis bar du bdag bzlog khyer la thal rang du gyes pa tsam las mthar thug la mi mthun pa med/ des na kun rdzob khas len tshul gyis thal 'gyur pa la 'jig rten grags sde spyod pa/ rang rgyud pa'i slob dpon legs ldan 'byed la mdo sde spyod pa/ ye shes snying po dang bo dhi satwa la sogs pa la rnal 'byor spyod pa zhes rnam par phye ba yin no/ /