[A:45a]slob dpon legs ldan 'byed ni rang dang gzhan gyi grub mtha' thams cad la mkhas pa chen po des dbu ma snying po rtsa 'grel mdzad ces smreng la/ dbu ma rin chen sgron mar rtog ge 'bar ba'ang bdag gis byas zer bas/ de legs ldan phyi ma jo bo rje'i bla ma yin/ dang pos mdzad na rang rgyud kyi rtsa bar rigs la/ der mi 'dren pas brtag par rigs so/ /de'i slob ma dpal sbas/ de'i slob ma ye shes snying po des bden gnyis/ de'i slob ma zhi ba 'tsho zhes bya ba rgyal po khri srong lde btsan gyi bla ma/ rgyal pos mdzad pa'i bka' yang dag pa'i tshad mar za hor gyi bikShu chen po pa/ yul kha sar Nar 'khrungs pa/ dharma shAnti gho Sha 'jig rten gyis A tsarYa bo dhi sa twa zhes btags pa gsung rab thams cad la mkhas shing tshul khrims dang shes rab dang ldan pa mi 'phrog pa'i brtson 'grus la zhugs pa zhes bsngags pa des dbu ma rgyan/ de'i slob ma ka ma la shI la/ des dbu ma snang ba ste rang rgyud kyi gzhung gsum du gnas so/ /dpal ldan zla ba grags pa ni yul lho phyogs sa ma nar 'khrungs te ArYa de wa bsten/ rig pa'i gnas dang khyad par klu sgrub yab sras kyi gsung rab la brten nas mkhas pa chen por gyur pa/ skye ba lnga brgyar 'jam dpal gyis byin gyis brlabs la/ ri mor bris pa'i ba la 'o ma bzho nus pa/ rdo'i ka ba la phyag g.yugs pa mi thogs par thal byung du 'gro ba/ des dbu ma la 'jug pa rtsa 'grel dang / tshigs gsal la sogs pa bstan bcos du ma mdzad/ sgra mdo kun tu bzang po bya ba tshigs su bcad pa yod pa zhig mdzad pa tsandra go mis gzigs te/ rang gi las lhag par mthong ste/ rang gi brtsams pa khron par bskyur ba yin/ kla klo'i dmag byung ba'i tshe rdo'i sengge la phyag brgyab pas de 'bum du song / de rnams kyis dmag tshogs brlag par byas so zhes grags so/ /shar phyogs bhaM ga lar 'khrungs pa'i tsandra go mi zhes bya ba bcom ldan 'das sgrol mas rjes su gzung ba de zla grags la rtsod par 'ongs pa'i tshe/ zla grags kyis su zhes drir btang bas tsandra go mir shes nas ci shes dris pas/ sgra pANi pa/ mtshan brjod/ bstod pa brgya lnga bcu pa gsum shes zer bas/ mkhas pa chen por shes nas dge 'dun gyis bsus pa na/ nga rten dge bsnyen yin pas mi rigs dgongs te/ 'jam pa'i dbyangs kyi sku shing rta'i steng du bzhag de'i rgyab tu bzhugs nas byon pa'i lam du 'jam dbyangs la bstod pa mdzad pas/ sku de dbu yon mdzad nas nga la de lta bu'i yon tan 'dug pa nam zhes pas