[A:46a]sku de 'jam dbyangs mjing yon mar thogs/ der dpon slob gnyis 'dzom nas rtsod pas zla ba grags pa rig pa rno la/ des de ring gi lan 'jig rten dbang phyug la zhus nas gnang bar btab pas/ zla grags the tshom du gyur pas phyi bzhin snyegs pa na 'jig rten dbang phyug gis slob pa gzigs te/ 'phags pa nye ring ma mdzad ces gsol pas sku de phyag mdzub bskum pa ma byung bar lus pas deng sang yang thugs rje chen po mdzub ker zhes grags so/ /rtsa she'i 'grel pa ga las 'jigs med shes rab sgron me'i TIka chen spyan ras gzigs b.ratal zhugs kyis mdzad par rang 'grel du bshad kyang / tshig gsal las 'on kyang sbyor ba'i ngag rgyas par rjod par byed pa gang yin pa 'di ni 'grel pa mkhan po rnams kyi lugs yin no zhe na de'ang yod pa ma yin te/ rtsod pa zlog pa'i 'grel pa mdzad pa na slob dpon gyis kyang sbyor ba'i ngag ma gsungs pa'i phyir ro/ /zhes gsungs pas de des mdzad na de skad sbyar mi dgos par 'gyur bas so/ /de bas na thal rang gnyis ka dbu ma rab tu mi gnas pa'i dbye bar zad la/ thogs med 'phags seng gi dbu ma ni sgyu ma lta bu ste/ dang pos sher phyin dngos bstan bkral bas lta ba thams cad bzlog ste lhag pa'i shes rab bskyed pas theg chen gyi chos mngon pa dar bar mdzad la/ gnyis pas ni sbas don sgyu ma lta bu'i lam gyi rim par bkral bas mngon par rtogs pa gong nas gong du 'phel ba'i lhag pa'i ting nge 'dzin bskyed pas theg chen gyi mdo sde rgyas par mdzad pa yin la/ don la lta spyod zung du 'jug pa'i phyir gnyis po 'gal med du 'khyer shes dgos so/ /rgya'i slob dpon rdzogs gsal gyi dgongs 'grel gyi 'grel chen du/ 'jam dpal rtsa rgyud kyi lung / nga ni mya ngan 'das 'og tu/ /lo ni dgu brgya lon pa na/ /thogs med ces bya'i dge slong ni/ /bstan bcos de ni don la mkhas/ /mdo sde nges don drang ba'i don/ /rnam par rab tu mang po 'byed/ /'jig rten rigs pa ston bdag nyid/ /gzhung byed ngang tshul can du 'gyur/ /de'i rig pa sgrub pa ni/ /sA la'i pho nya mo zhes brjod/ /de yi sngags kyi mthu yis ni/ /blo ni bzang por skye bar 'gyur/ /bstan pa yun ring gnas bya'i phyir/ /mdo yi de nyid don sdud byed/ /lo ni brgya dang lnga bcur 'tsho/ /de lus zhig nas lha yul 'gro/ /'khor ba rnams su 'khor ba na/ /yun ring bde ba rjes myong nas/ /bdag nyid chen po mthar gyis te/ /byang chub thob par 'gyur ba yin/ /zhes lung