[A:49a]phyir thogs med ces bya ba/ /chos rgyun ting 'dzin stobs kyis drangs pa'i bdud rtsi'i chos/ /'phags pa mi pham zhal gyi bum pa nas blugs pa/ /gsan pa'i snyim pas gsol ba de la phyag 'tshal lo/ /zhes 'byung la/ 'grel chung gi bshad pa tshig gsal du/ slob dpon thogs med sa gsum pa 'od byed pa brnyes kyang dbyig gnyen 'dul ba'i don du sems tsam du bstan no zhes 'byung ngo / /de yang byams pa mjal dus na chos rgyun/ de nas sa gsum par 'phar zhes sbyar ro/ /de'i gcung po dbyig gnyen gyis chos mngon pa dar bar smon lam btab pa'i stobs las/ gzhon nu nas kha cher slob dpon chen po 'dus bzang gi drung du phyin/ der spyir rig pa'i gnas thams cad dang / khyad par nyer sbas la sogs pa dgra bcom pa rnams kyis mdzad pa'i bye brag tu bshad pa zhes sam/ chos mngon pa'i mdzod ces bya ba sogs mngon pa bslabs pas tshegs med par mkhyen nas rgya gar du 'byon par chas lam du zhugs pa'i tshe kha che'i sho gam bsrung ba'i gnod sbyin gyi rten yod pas phrogs nas lan gsum gyi bar du zlog kyang nor ni med/ chos blo la yod pa 'bral du mi btub pas btang ste nA lendra byon pa dang / gcen gyis bstan bcos mang du brtsams pa thos nas/ kye ma thogs med nags su lo/ /bcu gnyis bar du ting 'dzin bsgrubs/ /ting 'dzin ma grub glang chen gyi/ /rgyab khal longs pa'i grub mtha' brtsams/ /zhes theg pa chen po'i chos dang gang zag la bstings pa gcen gyis gsan nas/ log sgrub don med du 'gyur ba mkhyen te/ de bzlog pa'i phyir slob ma gnyis sa bcu pa dang blo gros mi zad pa 'dzin du bcug nas gcung can song la srod dang tho rangs thon cig ces bsgo ba ltar bsgrubs pas/ srod la theg chen 'di rgyu bzang la 'bras bu g.yel ba 'dra gsungs/ tho rangs rgyu 'bras gnyis ka bzang bar 'dug pa la ngas skur ba btab pa lce 'dis lan pas chod gsungs nas spu gri btsal ba'i tshe/ khong gnyis kyis ljags 'gum mi 'tshal/ de'i sgrib pa sbyang thabs gcen la mnga' bas der gshegs so zhes smras te/ de la gsan nas byon no/ /der chos mang du gsan zhing 'bel gtam mdzad pa'i tshe/ gcung ni spobs pa shin tu myur/ gcen bul la bzang po byung bas/ 'di'i rgyu ci dris pa dang / khyod ni skye ba lnga brgyar paNDYi tar gyur pas skyes thob kyi shes rab che ba yin/ nga la de lta bu med pas yi dam zhig la dris shing lan 'debs pa yin gsungs/ de bdag la bstan par zhu byas pas/ rje btsun la zhu yi gsungs nas zhus pas/ khyod so so skye