[A:4a]mthar mngon par rdzogs par sangs rgyas pa'i tshul la gdul bar bya ba mchog dman bar ma'i snang bas tshul du mar gyur kyang / spyi 'gro dman pa nyan thos la sogs pa dang mthun par gleng ngo / /de la ston pa 'di sngon theg pa chen po'i rigs la gnas pa'i dus na/ las kyi nus pas dmyal ba'i lcags bsregs kyi sa gzhi la shing rta 'dren pa'i gyad gcig tu skyes so/ /de'i tshe zla bo stobs chung ba la srung ma a wang gis yang yang bsnun pas shin tu snying brtse ba skyes te 'di la ma snun cig 'di'i skal ba yang bdag gis drang bar bya'o zhes smras pas/ de rab tu khros te de nyid la bsnun pas tshe 'phos te lhar skyes/ rgyal po rab gsal du 'khrungs pa'i dus glang po che 'dul sbyong mkhan las sangs rgyas kyi mtshan thos pas byang chub kyi thugs bskyed/ de nas shAkya thub pa chen po'i spyan sngar thugs bskyed pa nas grangs med dang po'i 'go brtsams te de bzhin gshegs pa rin chen gtsug tor can mchod pa'i bar gyis grangs med dang po rdzogs/ de nas sa dang po thob/ de nas gnyis pas sa bdun pa thob/ de nas bram ze'i khye'u sprin zhes bya bar gyur nas bram ze rin po che las rig byed bslabs nas yon 'bul ba'i phyir yul dbus kyi grong khyer dag tu song ba rgyal po dgra thul gyi pho brang pad mo can zhes bya ba'i tshong 'dus kyi dbus su phyin no/ /de'i tshe bram ze mar me'i bdag po'i sras de bzhin gshegs pa mar me mdzad 'jig rten du byon te/ nam mkha' la lha rnams me tog dang rol mo sil snyan glu dbyangs dang bcas te bzhugs pa mthong ste/ khyed ci byed dris pas/ khyod kyis mi shes sam/ 'di na sangs rgyas mar me mdzad bzhugs so zhes zer ro/ /de skyi bung zhig byed cing / kye ma sangs rgyas byung ba ni rnyed par dka' bas bdag gis slob dpon gyi yon phyis gsab par bya ste/ kar sha pa Na lnga brgya po 'dis sangs rgyas mchod par bya'o snyam du bsam nas bram ze'i bu mo bzang len ldan la rngan pa/ skye ba thams cad du khyim thab byed par khas blangs te utpal lnga nyos nas de sangs rgyas la gtor te/ kriShNa sa ra'i pags pa bting nas mar me mdzad de bzhin gshegs pa kun nas spyan bdag gi lhag pa'i bsam pa thugs su chud par mdzod la/ ri dwags kyi pags pa 'di la zhabs 'jog par mdzod cig ces mnyes par byas te/ ral pa gser gyi mdog can stan du bting nas mar me mdzad kun nas spyan 'di la zhabs mi 'jog gam lus mi ston na 'di nyid du lus bskam par bya'o zhes yi dam brtan por