[A:56a]rig rnams kyi bshad pa'i phyogs kyi gzhi mdzad bstan pa yin/ /zhes dang / gzhan yang / bla ma dag ni ring na bzhugs pa grags pas rnam par byang ba zhi ba'i 'od kyi bdag /dran pas dgongs par mdzad par gyur cig snyam nas bdag gis 'grel pa don gsal byas pa yin/ /zhes pas bu ston bsod nams grags pa dang / slob dpon chen po zhi ba'i 'od kyi slob mar bshad pas yon tan 'od kyi slob ma min gsungs la/ gna' mchan las zhi ba'i 'od de'i slob ma'o/ /de'i slob ma shAkya bshes gnyen 'di ni rnal 'byor rgyud la mkhas pa gsum du bgrang ba'i shAkya bshes gnyen de yin gyi slob dpon klu sgrub kyi gdan sa mdzad mkhan de ma yin no/ /shAkya 'od kyis sum brgya pa rtsa 'grel mdzad/ yon tan 'od kyi slob ma chos kyi bshes gnyen gyis 'dul ba rgya cher 'grel mdzad/ 'grel chung gi 'grel pa tshig gsal mdzad pa po dang gcig shAkya 'od kyis slob ma sengge'i gdong can/ de'i slob ma kha che'i mkhan po dzi na mi tra'o/ /slob dpon dbyig gnyen gyi slob ma phar phyin rang la mkhas pa 'phags pa rnam par grol ba'i sde ni/ gtsug lag khang rgya chen po du ma'i bdag po/ 'phags pa ku ru kulle'i sde pa/ slob dpon sangs rgyas 'bangs kyi dbon po slob dpon dbyig gnyen bsten nas mkhas pa chen por gyur pas rab tu dga' ba thob pa des sangs rgyas la mngon sum du nyan nas/ sher phyin gyi don ston pa mngon par rtogs pa'i rgyan gyi 'grel pa nyi khri lnga stong pa dang sbyar ba nyi khri snang ba zhes pa mdzad/ de'i slob ma btsun pa rnam grol sdes kyang 'grel pa mdzad/ de'i slob ma yang dag rnam snang mdzad/ de'i slob ma ha ri bha dra ste sengge bzang po/ de'i lo rgyus ni sngon rgya gar shar phyogs seng ldeng gi nags zhes bya ba na sdong po chen po zhig la shing gi lha zhig yod pa las/ yul de'i phyugs rdzi zhig yod pa dus las 'das/ de'i chung ma gzugs byad bzang mo zhig yod pa phyugs 'tshor song ba dang / shing gi lha des 'dod pa spyad pas bu zhig byung ste go pA la zhes grags so/ /de la phas nor bu rin po che byin pas de'i yon tan gyis sa phal la dbang bsgyur ro/ /nA lendra sogs kyi dge 'dun la bkur bsti legs par byas te bstan pa'i sbyin bdag tu gyur to/ /de'i btsun mo dbang chung ba zhig gis rgyal po dbang du bya ba'i phyir slob dpon bram ze zhig la rig pa zhus pas/ des ri bo gangs can las sman blangs te rgya btab bran mo la bskur bas/ de stegs la 'dred nas lhung bas sman chu la shor ro/ /rim gyis rgya mtshor zhugs pa