[A:63a]klung sum cu rtsa gnyis kyi bye ma snyed kyi 'jig rten gyi khams kyi rdul phra rab snyed kyi 'jig rten gyi khams 'das pa na/ thal bas khebs pa zhes bya ba'i 'jig rten gyi khams der/ thal ba'i dbang po'i dbyangs zhes bya ba'i de bzhin gshegs par skyes so/ /des sprul pa'i sku sna tshogs kyis rgyud zhu ba dang / sdud pa dang / 'chad pa po mdzad pa'i tshul las/ re zhig gsang ba'i sgrol ma zhes bya ba'i rnal 'byor chen po'i rgyud las/ gsang ba chen po'i rgyud shes pa dang / bshad pa sus byed/ bka' stsal pa/ u rgyan gyi yul dpal rdo rje chen po'i gnas su/ u rgyan gyi rgyal po indra bhU ti zhes bya ba des shes pa dang / bshad pa dang / sems can la gsal bar byed do zhes gsungs pas/ de'i tshul ni/ bcom ldan 'das wA rA Na sI na bzhugs pa'i tshe/ de nas nub phyogs su dpag tshad lnga brgya na u rgyan zhes bya ba'i yul khams na rgyal po indra bhU ti zhes bya ba yod de/ des rang gi khang bzang rin po che sna bdun las byas pa'i steng du phyin pa'i tshe nyan thos kyi dge 'dun rnams nam mkha' la snga dro nub tu 'gro /phyi dro shar du log pa gzigs pas/ rang gi blon po zla ba bzang po la dris pas/ de na re lha lags de ni bdag gis ma 'tshal te/ gzhan dag la dri'o zhes gsol nas/ des blon po rig pa can la sogs pa grong khyer ba rnams la dris pas/ kha cig na re/ 'di nas shar phyogs su dpag tshad lnga brgya na grong khyer wA rA Na sI zhes bya ba yod de/ de na rgyal po zas gtsang gi bu rgyal bu gzhon nu don thams cad grub pa sangs rgyas nas chos kyi 'khor lo bskor zhing bzhugs pa de'i 'khor yin no zhes zer ro/ /de nas rgyal pos sangs rgyas kyi mtshan thos pas shin tu dad de/ de'i 'khor yang 'di lta bu'i rdzu 'phrul dang ldan na/ de ni nges par rdzu 'phrul dang thugs rje chen po dang ldan pa'o snyam ste/ pus mo'i lha nga sa la btsugs nas zhal shar du gzigs shing me tog dang bcas pa'i thal mo sbyar te/ ngag tu thams cad mkhyen pa thugs rje can rdzu 'phrul gyi zhabs mnga' ba 'khor dang bcas pa sang gi gdugs tshod la 'dir gshegs su gsol zhes gsol ba btab pas ston pa 'khor dang bcas pa sang der byon/ der rgyal po 'khor dang bcas pas mchod pa mang pos mchod nas/ bdag cag la sogs pa srid pa'i sdug bsngal las