[A:78a]ba/ chang gis gzi ba'i skyugs pa dang go la zos pa'i rtsigs ma kun 'phyag pa sogs g.yog gyis/ nub sgrub pa gyis/ de ltar byas na lo bcu gnyis na grub pa thob nas yul khams de smin par byas/ mthar mi phyugs thams cad mkha' spyod du 'gro bar 'gyur ro zhes lung bstan/ slob dpon spyod pa la gshegs/ rgyal pos rgyal srid bor btsun mo stong phrag bcu gnyis kyi nang nas thon te khur ba'i grong du ji ltar bsgo ba ltar byas pa'i lo bcu gnyis kyi mthar/ nub cig nyal po la 'ongs pa'i skyes pa zhig phyi rol du phyin tsa na/ sgo drung gi khol po'i spyil po la me 'bar ba mthong nas bltas pas gtum mo'i 'od du 'dug nas/ mi de na re bdag cag gis ma legs pa byas pa bzod par gsol dgos zhes smad 'tshong ma la bgyis so/ /der de gnyis kyis phyin nas/ khyed dngos grub thob pa zhig ste bdag cag gi nyes pa bzod par bzhes la rjes su bzung du gsol ces byas pas/ tshogs 'khor shoms shig zer/ DA ma ru dkrol bas bud med stong phrag bcu bzhi 'dus/ nub mo tshogs 'khor byas/ tho rangs thams cad grub pa thob ste mkha' spyod du gshegs so/ /sngar gyi skyes pa de gcig pu lus pa na/ bdag ji ltar byed zhus pas/ grong khyer 'di'i dbus na rdo'i glang po che zhig yod/ de da lta kha nub tu bltas/ lo re la til re'i tshad tsam nur nas kha shar du bltas tsa na khur ba'i grong gi mi rnams kyang der skyes te khyod dang bcas pa thams cad kyis mkha' spyod thob/ da lta khyod la skal ba med ces gsung ngo / /blon pos kyang sngar ji ltar gsungs pa ltar byas pas/ bcu gnyis kyi mthar sngar bzhin gyur pa la chang 'tshong ma de dang gzhon nu ma'i zhing gi mi phyugs thams cad mkha' spyod du song nas tshar gcig yul de stongs par gyur te/ blon po de la Ding gi pa zhes grags so/ /dha ri ka pas rdo rje dril bu pa byin gyis brlabs te/ de ni rgya gar shar phyogs pa randra'i rgyal po'i sras su 'khrungs yab 'das pa dang rgyal tshab tu mnga' gsol bas/ rgyal srid la snying po med pa gzigs nas bros te nA lendrar byon/ mkhan po rgyal ba'i lha la rab tu byung / mtshan blo gros snying po'i dpal du btags/ rig pa'i gnas la sbyangs pa phyi nang gi grub pa'i mtha' thams cad kyi pha rol tu byon/ de'i tshe mu stegs ral pa can zhig rgyal po la dpang po bcol nas